Moderatori dhe kantautori i njohur Ardit Gjebrea ka treguar për studentët e një universiteti privat në Tiranë, një nga momentet më të vështira në jetën e tij.
Gjebrea është pyetur për çastet kur është rrëzuar dhe ka gjetur sërish forcën për t’u ringritur, dhe ai ka treguar rrugën e emigrimit në Itali, në vitet e para të tranzicionit.
“Ishte 31 dhjetor dhe unë me gruan dhe djalin që ishte vetëm 2 vjeç kishim gjithsej vetëm 30 mijë lireta, që janë pak a shumë 30 mijë lekë të vjetra. Ne duhet të festonim Vitin e Ri dhe të vazhdonim jetën me aq para.
Nuk kishim asgjë për të ngrënë. E kishim traditë në familjen tonë, unë kisha marrë gjithmonë një dhuratë… (përlotet)… dhe unë vajta i bleva djalit tim një makinë të vogël, 5 mijë lireta… Ishte një moment shumë i vështirë, por ka kaluar. Ndaj djali im është forca ime që më frymëzon gjithmonë”, ka thënë Gjebrea.
