Erion Isai dhe Besart Kallaku shkëlqyen gjatë moderimit të festivalit “Kënga Magjike”, duke mbajtur mbërthyer pas ekranit të gjithë spektatorët me batutat e tyre. Dhe nga “Pallati i Kongreseve”, i zoti i shtëpisë Ardit Gjebrea hodhi LIVE idenë që dyshja t’i bashkohet televizionit “Klan” me një program humori, duke i hedhur sytë nga Drejtori i Përgjithshëm i Televizionit, Aleksandër Frangaj.
Mesa duket, kjo ide nuk ra në vesh të shurdhët, pasi në sezonin e ri, dyshja e humorit së bashku me aktorin e njohur si “Kimikati” i janë bashkuar televizionit “Klan”. Lajmin e ka konfirmuar vetë Besart Kallaku, ku në një postim në profilin e tij në “Instagram”, shfaqet krahas Ardit Gjebreas, Aleksandër Frangajt dhe dy kolegëve të tij.
Ata duken shumë të përqëndruar duke diskutuar mbi detajet e fundit të skenografisë. Mirëpo prania e Ardit Gjebreas mes tyre, ngre dyshimet se aktorët mund t’i bashkohen stafit të “E diela Shqiptare”! Na mbetet vetëm të presim se çfarë do të ndodhë në javën e parë të shtatorit.
