“Anuloje at’ b…” nuk është ekzaktësisht shprehja më e përdorur e moshës së tretë. Megjithatë, një gjyshe me shami duke kërcyer këngën me këtë titull të reperit Buta, po bën xhiron e rrjeteve sociale.
Ishte një miku i Butës ai që xhiroi zonjën e cila kërcente pranë derës së një makine këngën “Anuloje” të DJ Flow dhe Butës, sipas modelit të videove të sfidës “Kiki” që pushtoi rrjetin gjatë kësaj vere.
Bashkëpunimi mes DJ Flow-t dhe Butës u publikua në shtator të vitit të kaluar, duke u bërë ndoshta kënga më e kërcyeshme në diskotekë e reperit nga Kosova.
Në videon zyrtare të këngës, shfaqen Buta, Flow dhe një vajzë që kërcen mbi një top palestre.
“Anuloje” ka një ritëm minimalist i cili përsëritet, ashtu si edhe kënga “In My Feelings”, që verën e kaluar hapi një sfidë për videot më të bukura të njerëzve që e kërcenin para derës së hapur të makinës.
Nuk do ishte çudi nëse gjyshja me shami, të niste një sfidë të re kërcimi me produksionin shqiptar i cili duhet thënë se është goxha fiksues.
