Aktorja e njohur hollivudiane Angelina Jolie ka rrëfyer se nuk është penduar aspak për vendimin që mori dhjetë vite më parë për t’iu nënshtruar një mastektomie të dyfishtë dhe për të hequr vezoret. Vendimi erdhi pasi Jolie zbuloi se ishte mbartëse e gjenit të rrallë BRCA, i cili ndërlidhet me rrezik të lartë për zhvillimin e kancerit të gjirit dhe të vezoreve.
Në një intervistë për revistën Hello!, Jolie shpjegoi se vendimi i saj ishte thellësisht personal dhe i ndikuar nga historia familjare. Nëna e saj, Marcheline Bertrand, humbi jetën në vitin 2007, në moshën 56-vjeçare, pas një beteje të gjatë me kancerin e gjirit dhe të vezoreve. Po ashtu, edhe gjyshja e saj kishte ndërruar jetë nga e njëjta sëmundje.
“Vendosa ta bëj sepse kjo është ajo që i mori jetën nënës sime. Nuk po them që të gjithë duhet të bëjnë të njëjtën gjë, por është e rëndësishme të kemi një zgjedhje”, tha Jolie.
Në filmin e saj më të ri, Couture, Jolie interpreton rolin e një gruaje që përballet me diagnozën e kancerit të gjirit dhe kalon nëpër sfida si kimioterapia dhe rënia e flokëve. Ajo tha se shpreson që kjo histori të japë zë përvojave të grave që ndihen të lënduara dhe të vetmuara, dhe t’i bashkojë ato përmes ndjeshmërisë dhe forcës.
