Mesfushori Amir Abrashi luajti 51 ndeshje me Kombëtaren duke shënuar vetëm një gol, atë kundër Andorrës.
FSHF-ja kishte organizuar një ceremoni speciale për 35-vjeçarin.
“Amir Abrashi ka shkruar emrin e tij me gërma të arta në historinë e futbollit shqiptar dhe meriton vlerësimin maksimal nga çdo tifoz kuqezi. Faleminderit Amir!”, shkruhet në postimin e FSHF-së.
Sot me fillim në orën 18:00 në stadiumin “Air Albania” në Tiranë po luhet ndeshja mes Shqipërisë dhe Anglisë. Dueli është i fundit për Grupin K kualifikues të Kupës së Botës 2026, teksa dy skuadrat i kanë përmbushur objektivat dhe përballja e sotme mund të cilësohet pa frikë si një “miqësore luksi”.
Anglia është e para në Grupin K dhe për momentin ka 21 pikë pas shtatë takimeve, teksa i ka të gjitha fitore dhe nuk ka pësuar asnjë gol. “Tre Luanët” e kanë siguruar një biletë për në finalet e Botërorit 2026 që do mbahet verën që vjen në Amerikën e Veriut.
Nga ana tjetër, me 14 pikë Shqipëria ka siguruar matematikisht zonën play-off të Kupës së Botës, kjo për herë të parë në histori. Të enjten më 20 nëntor tanët do mësojnë edhe rivalin në gjysmëfinalen që do luhet më 26 mars 2026.
Para sfidës së sotme ka pasur festë në Kombëtare dhe protagonist u bë mesfushori Adrion Pajaziti i cili festoi 23 vjetorin e lindjes me ekipin.
