Amarda Toska dhe Ermal Mamaqi janë prindër të një djali, Joelit, dhe së shpejti pritet të bëhen edhe me një vajzë. Ami është treguar e kujdesshme duke u rezervuar në publikimin e fotove me barkun e rrumbullakosur, ndërsa moderatori gazmor mundohet gjithmonë ta “tradhëtojë” bashkëshorten në këtë pjesë.
Për herë të parë Ami është shfaqur në television me barkun e rrumbullakosur. Në një intervistë për “Jo vetëm modë” ajo tregoi se shtatzënia po i shkon shumë mirë dhe janë në fazën kur po mundohen të përzgjedhin emrin e vajzës.
Ami tregoi gjithashtu se këtë 14 shkurt i është dashur të punojë dhe nuk ka festuar ende, megjithëse ne mendojmë se Ermali do ta ketë surprizuar me dhuratat e tij.
“Ky 14 shkurt kaloi në punë, sepse kur ka festa ne jemi në punë. Ne Shën Valentinin nuk e konsiderojmë si ditën tonë, kur duam dhe kur kemi mundësi dalim dhe festojmë. Shtatzënia më ka shkuar shumë mirë, kur u nis në fillim e shihja si rrugëtim të gjatë dhe tani që po i vjen fundi them sa shpejt kaloi dhe dua t’i shijoj edhe këto momente të fundit. Luhatje humori dhe neps nuk kam patur. Nepsi besoj ka qenë në kohën e prindërve tanë kur mungonin shumë gjëra. Lidhur me emrin e vajzës nuk kemi vendosur ende, kemi disa emra të preferuar por nuk dua t’i them sepse duket sikur e shpall pastaj. Djalit ia kemi vendosur më herët, ndërsa me vajzën akoma s’na e ka bërë klik emri i duhur”, tha Ami.
Gjatë intervistës ajo u shfaq e veshur me një fustan të zi dhe me një pelush bezhë. Kilogramët e tepër ishin të dukshëm, por nuri i shtatzënisë e tregonte më të bukur.
