Aleanca e 6 organizatave ndërkombëtare e financuar nga KE ka kërkuar që qeveria të heqë dorë nga themelimi i Agjencisë për Media dhe Informim, në mënyrë që të mos ketë kontroll të plotë mbi informacionin publik në Shqipëri.
Për të mbrojtur lirinë e fjalës së lirë të gazetarëve dhe të drejtën e publikut për informim, Aleanca Për Liri të Mediave dhe Përgjigje të Shpejtë, ka kërkuar gjithashtu ndihmën e Bashkimit Europian.
“Ne po ashtu i bëjmë thirrje Bashkimit Evropian që menjëherë të angazhohet me Qeverinë shqiptare për të diskutuar këto shqetësime, si çështje me prioritet në bisedimet për anëtarësim”, ka thënë aleanca.
Aleanca Për Liri të Mediave dhe Përgjigje të Shpejtë është krijuar në vitin 2020 dhe financohet nga Komisioni Evropian.
Sipas saj, planet për krijim të Agjencisë për Media dhe Informim në Shqipëri, të shpalosura gjatë sesionit të parë të legjislaturës së re në Parlamentin e Shqipërisë më 18 shtator, mund të centralizojnë kontrollin mbi marrëdhëniet publike të Qeverisë në një entitet të vetëm.
Sipas aleancës, zëdhënësit e ministrive dhe të departamenteve qeveritare nuk duhet të ndalohen që të flasin drejtpërdrejt me mediat dhe informacioni publik apo komentet nuk duhet të presin konfirmim nga askush. Raportimet në mediat shqiptare duhet të jenë sa më transparente dhe të vërteta, pa u filtruar nga persona të vendosur pikërisht në pozitën e barabartë me një ministër qeveritar.
“Gazetarët në Shqipëri janë duke punuar aktualisht në kushte jashtëzakonisht të vështira për të pasur qasje në informacion nga burimet qeveritare. Qeveria komunikon me gazetarët përmes grupeve në platformën WhatsApp, në vend që të përdorë kanale zyrtare. Gazetarët që punojnë për media të pavarura diskriminohen vazhdimisht kur kërkojnë informacione nga ministrat. Gazetarëve që shihen si përfaqësues të ‘opozitës’ nuk u mundësohet akreditimi dhe u mohohet bërja e pyetjeve në konferenca për media”- shprehet aleanca.
