Prej disa ditësh në mediat online po qarkullon lajmi që Albi Nako dhe balerina Alba Hoxha kanë nisur një lidhje të re dashurie. Ata janë komentuar si çifti i ri i showbiz-it shqiptar nisur nga disa foto që kanë postuar në Instagram, ku shfaqen të dy në Paris.
Në një prononcim për revistën “Class” Albi ka pranuar se është së bashku me Albën në Paris, por për një arsye të madhe. Koreografi i njohur dhe balerina e Tv Klan para pak ditësh kanë udhëtuar drejt Belgjikës, Parisit dhe Amsterdamit për një projekt që do të vënë në jetë së shpejti dhe për të cilin po përgatiten prej kohësh.
“Ne jemi këtu për punë, vetëm kaq. Situata është e tillë: ne postojmë një foto dhe kaq mjafton të bëhet lajm. Po udhëtojmë me Albën sepse po nënshkruajmë kontrata me disa balerinë të huaj, kryesisht 6 balerinë italianë, të cilët do i bashkohen trupës së baletit. Së shpejti, rikthehemi në Tiranë për të vënë në jetë projektin. Kaq është e gjitha…”, është shprehur Albi për “Class”.
Që pas divorcit me balerinën Klaudia Pepa ai ka qenë në qendër të vëmendjes mediatik për nisjen e një lidhje të re, por që ai e ka mohuar.
