Një fenomen masiv ka nisur të shfaqet në vendet e BE-së: Fëmijët të mitur shqiptarë braktisen dhe kërkojnë azil. Autoritetet evropiane kanë njoftuar Policinë shqiptare për rritjen e këtyre rasteve.
Burime nga policia njoftojnë se vijojnë kontrollet intensive dhe ndëshkimet ligjore për parandalimin e braktisjes së fëmijëve në vendet e BE-së, me qëllim azilkërkimin.
Rasti i fundit
Policia Kufitare e Kakavijës ka intensifikuar punën për kontrollin e imtësishëm të dokumentacionit për të udhëtuar, intervistimet dhe bashkëpunimin me homologët e shtetit grek, për parandalimin e azilkërkimit dhe braktisjen e fëmijëve në vendet e BE-së.
Në këtë kuadër është proceduar penalisht, për veprën penale “Braktisja e të miturit”, shtetasi Shkelqim Zenaj, banues në Librazhd. Procedimi penal për ketë shtetas filloi pasi nga verifikimet e kryera ka rezultuar se ky shtetas ka kaluar me djalin e tij të mitur ( E. Z.) kufirin për në Veria, Greqi dhe e ka lënë atje me qëllim që të përfitonte azil politik.
“Departamenti i Policisë Kufitare në Policinë e Shtetit është duke bashkëpunuar ngushtësisht me homologët e të gjitha vendeve të hapësirës SCHENGEN, për verifikimin, identifikimin dhe ndëshkimin ligjor të të gjithë atyre që braktisin të miturit për qëllime azilkërkimi”, deklaroi policia pas këtij rasti.
Policia e Shtetit përsërit apeli për të gjithë qytetarët që duan të udhëtojnë në hapësirën SCHENGEN, të mos ndërmarrin asnjë veprim që ka si qëllim azilkërkimin, pasi shanset për të fituar atë janë zero.
Kush fiton azil?
Por këtu situata është aq e pashpresë, saqë njerëzit nuk hezitojnë ta provojnë fatin. Vetëm 7 për qind të shqiptarëve që aplikuan për azil në vendet e Bashkimit Europian gjatë vitit 2019, iu pranua kërkesa.
Sipas të dhënave të Eurostat, në vitin 2019 rreth 20 mijë shqiptarë aplikuan për azil në shtetet e BE-së, por vetëm 1470 prej tyre iu pranua kërkesa. Fëmijët përfitojnë nga ligjet që favorizojnë mbrojtjen e tyre, sidomos në Angli, Francë dhe vendet skandinave.
Shteti që ka pranuar më shumë kërkesa për azil (820 ose 55% e totalit) ishte Franca. Por krahasuar me numrin e atyre që aplikuan për azil në Francë, mbi 11 mijë, për qindja e pranimit është e ulët: 7,4 për qind.
Franca është një prej shteteve që ka shprehur më shumë shqetësimin për rritjen e kërkesave për azil nga shqiptarët.
Fëmijët rrezikohen nga bandat kriminale
Një pjesë e madhe e azilkërkuesve janë të mitur, pasi ligjet e BE-së i favorizojnë ata për marrjen e strehimit.
Sipas të dhënave të publikuara nga BBC në vitin 2017, grupi më i madh janë djem të moshës 16 dhe 17-vjeçare, që vijnë më së shumti nga Afganistani dhe Eritrea, ndërsa të tretët në listë janë fëmijët e pashoqëruar shqiptarë. Nëse nga Afganistani kërkuan azil 876 fëmijë, nga Shqipëria numri kap shifrën e 706 fëmijëve, krahasuar me 148 nga Siria.
Hulumtimet nga organizatat bamirëse Ecpat UK and Missing People zbuluan se nga 31 fëmijët e identifikuar si viktima të trafikimit në Croydon nga shtatori 2014-2015, 20 për qind u zhdukën nga shtëpitë e tyre të strehimit. Besohet se shumë nga këta fëmijë kthehen përsëri tek trafikantët e tyre.
Politika dhe mirëqenia e fëmijëve
Dërgimi i fëmijëve për të kërkuar azil në vendet perëndimore e ka “shqetësuar” edhe kryebashkiakun Erion Veliaj. Kur ishte ministër i Mirëqenies Sociale ai do të shprehej:
“Megjithëse arsyet që çojnë fëmijët drejt emigrimit mbeten komplekse, është e sigurt të theksojmë që interesi më i lartë i fëmijës është që të rritet në familjen e tij, të gëzojë kujdesin prindëror, të mund të ndjekë shkollën dhe të mos detyrohet të punojë.
Mbi të gjitha të ndihet i sigurt për jetën e tyre. Në këtë kuadër, Ministria e Mirëqenies Sociale po bën një menaxhim të skemës ekonomike, në mënyrë që të përfitojnë ata që kanë vërtet nevojë”.
Largimi i të miturve, të pashoqëruar nga prindërit, drejt shteteve të tjera të botës, për të kërkuar azil, mbetet një problem shqetësues për vendin. Referuar të dhënave zyrtare, rezulton se 80 për qind e azilkërkuesve në Shqipëri i përkasin moshës 16-17 vjeç, nga të cilët në 90 për qind të rasteve janë meshkuj.
Për sa u takon fëmijëve që kërkojnë azil në Itali, pretendohet se nga rreth 1 mijë e 200 azilkërkues shqiptarë, 900 janë fëmijë. Të dhënat u bënë publike dje gjatë një takimi me temë: “Përgjigje efikase ndaj emigrimit të të miturve të pashoqëruar nga Shqipëria drejt vendeve të BE”, nismë e Delegacionit të BE në Shqipëri, Ambasadës Italiane dhe Organizatës Ndërkombëtare për Migracionin IOM.
