Nga një prej vendeve me popullsinë më të re, Shqipëria po plaket me shpejtësi dhe mund të kthehet në popullisinë me moshë më të madhe në Ballkan. Ndonëse në fillim të viteve ’90 kishim popullsinë më të re në rajon edhe në Europë, me moshë mesatare 24 vjeç, llogaritë e Kombeve të Bashkuara mbi Perspektivat e Popullatës tregojnë se deri në 2060-n mosha mesatare e popullsisë në vend do të jetë 48 vjeç.
Në 1994-n në vendet e rajonit mosha mesatare e popullsisë ishte mbi 30 vjeç, ndërsa në Europë vendet me moshë mesatare më të madhe në ishin Suedia, Italia dhe Gjermania, me 38 vjeç.
Në fillim të viteve 2000, mosha mesatare u rrit për të gjithë Europën, ndërsa në Shqipëri ishte 28 vjeç. Italia dhe Gjermania patën plakjen më të shpejtë, me moshë mesatare prej 41 vjeç.
Në 2021-shin projeksioni i Kombeve të Bashkuara mbi moshën mesatare është 35 vjeç në Shqipëri, ku krahasuar me vendet e rajonit sërish ka moshën më të re.
Por situata paraqitet e zymtë në 2060-n, kur sipas projeksioneve të Kombeve të Bashkuara, Shqipëria do të ketë një moshë mesatare më të madhe se vendet e rajonit si Maqedonia, Mali i Zi dhe Serbia, pikërisht 48 vjeç.
Ndër arsyet kryesore të plakjes së popullsisë së Shqipërisë me këtë ritëm të shpejtë janë rënia e lindjeve, emigracioni dhe rritja e jetëgjatësisë.
Rënia e lindshmërisë ka shkuar drejt niveleve të vendeve europiane, ndërsa emigracioni vazhdon të jetë në shkallë të gjerë.
Burimi: Monitor
