Në një prej ditëve më të nxehta të qershorit, me temperatura që në disa zona tejkaluan 38°C, Greqia është përballur me një situatë alarmante zjarresh pranë qytetit bregdetar të Palaia Fokaias, rreth 40 kilometra në jug të Athinës.
Rreth 130 zjarrfikës, të mbështetur nga dhjetëra vullnetarë, po luftojnë me flakët prej orësh në një terren të vështirë dhe të përfshirë nga tymi i dendur. Për shkak të rrezikut të lartë, mbi 1000 banorë janë evakuuar nga katër fshatra, Triantafyllia, Charakas, Katafygi, Tourkolimano si dhe nga qyteza bregdetare Thymari, pas sinjalizimeve të vazhdueshme nga numri i emergjencës civile 112.
Raportohet se dhjetëra banesa janë shkrumbuar, ndërsa të tjera kanë pësuar dëme serioze. Në ndihmë të banorëve kanë ndërhyrë edhe forcat e policisë, ndërsa forcat detare dhe anije zjarrfikëse janë pozicionuar në vijën bregdetare për të ndihmuar në përballimin e flakëve që rrezikojnë të përhapen më tej.
