Suedia ka regjistruar rastin e parë të varianti të ri infektiv të mpox, ose lija e majmunëve.
“Një person që kërkoi kujdes” në Stokholm “është diagnostikuar me mpox të shkaktuar nga varianti clade I. Është rasti i parë i shkaktuar nga clade I që diagnostikohet jashtë kontinentit afrikan,” tha Agjencia e Shëndetit Publik të Suedisë në një deklaratë – cituar nga Agence France-Presse (AFP).
Organizata Botërore e Shëndetësisë (OBSH) deklaroi të mërkurën se rritja e mpox (Monkeypox) në Afrikë është tani një emergjencë globale e shëndetit publik.
“Sot, komiteti i urgjencës u takua dhe më këshilloi se sipas tij, situata përbën një emergjencë të shëndetit publik me shqetësim ndërkombëtar. Unë e kam pranuar atë këshillë,” tha shefi i OBSH-së Tedros Adhanom Ghebreyesus në një konferencë për shtyp dje.
Ky është alarmi më i lartë i mundshëm i lëshuar nga OBSH për situatën aktualisht në përkeqësim.
Çfarë është Monkeypox?
Lija e majmunëve, e shkurtuar si “Mpox”, është një sëmundje virale e shkaktuar nga virusi i lisë së majmunit.
Virusi mund të përhapet ndërmjet njerëzve drejtpërdrejt ose nëpërmjet kontaktit me sipërfaqet e prekura më parë nga një person i infektuar. Ai gjithashtu mund të transmetohet nga kafshët e egra te njerëzit në rajonet ku virusi është i përhapur.
Simptomat e lisë së majmunit
Lija e majmunit shkakton një sërë simptomash që mund të ndryshojnë nga të lehta në të rënda.
Simptomat e zakonshme përfshijnë skuqjen, temperaturën, dhimbjen e kokës, dhimbjet e muskujve dhe dhimbjen e shpinës. Gratë shtatzëna, fëmijët dhe individët me sistem imunitar të dobësuar janë në rrezik më të lartë për të përjetuar simptoma më të rënda.
