Një incident ajror ka ngritur alarmin në Kuvajt, pasi një avion luftarak është rrëzuar pranë një baze ajrore të Shteteve të Bashkuara të Amerikës. Ngjarja ka ndodhur në afërsi të bazës ajrore Ali Al Salem, një prej objekteve më të rëndësishme ushtarake amerikane në rajon.
Sipas pamjeve të shpërndara në rrjetet sociale, avioni është parë duke marrë flakë në ajër, ndërsa humbte kontrollin dhe rrotullohej ngadalë drejt tokës. Pas disa sekondash, mjeti fluturues është zhdukur nga horizonti, duke u rrëzuar brenda një rrezeje prej rreth 10 kilometrash nga baza ajrore. Autoritetet lokale dhe ushtarake kanë rrethuar zonën, ndërsa masat e sigurisë janë forcuar menjëherë pas incidentit.
Deri më tani, shkaqet e rrëzimit mbeten të paqarta. Nuk ka asnjë konfirmim zyrtar nëse bëhet fjalë për një defekt teknik, gabim njerëzor apo faktorë të tjerë të jashtëm. Po ashtu, nuk është bërë e ditur se cilës forcë ajrore i përkiste avioni dhe nëse në bord kishte pilotë apo personel tjetër.
Sipas analizave mediatike, avioni i rrëzuar duket të jetë një avion luftarak me dy motorë, çka përputhet me modelet F-15E Strike Eagle ose F/A-18 Hornet. Kujtohet se edhe vetë Kuvajti operon me avionë luftarakë të tipit F/A-18, gjë që e bën edhe më të vështirë identifikimin e menjëhershëm të origjinës së mjetit.
Autoritetet përkatëse kanë nisur hetimet për të zbardhur rrethanat e plota të ngjarjes, ndërsa priten informacione të reja në orët dhe ditët në vijim.
