Çështja e ish-ministrit Saimir Tahiri do të gjykohet nga e para!
Gjykata e Apelit ka rrëzuar dënimin shkallës së parë për ish- ministrin e Brendshëm, dhe ka rikthyer çështjen për gjykim në seancën e kësaj të premteje që ka zgjatur rreth 30 minuta.
Trupa gjykuese u shpreh se nuk ka asnjë provë për shpërdorim detyre, për të cilën u dënua Tahiri, dhe nga sot ai nuk është më i dënuar por i pandehur.
Vendimi i shkallës së parë që dënoi Tahirin me 3 vite shërbim prove është rrëzuar, ndërsa Report.tv bën me dije se ish-ministri e priti i qetë vendimin për rigjykimin e çështjes së tij.
Saimir Tahiri u vu nën akuzë pas arrestimit të grupit “Habilaj” ndërsa që në fillim ai pretendoi pafajësi duke e quajtur një proces farsë me prova të montuara.
Në shtator të vitit të kaluar ish-Prokuroria e Krimeve kërkoi dënimin e tij me 12 vite, ndërsa për shkak të gjykimit të shkurtuar shkonte 8 vite, por gjykata e dënoi Tahirin me 3 vite burg me shërbim prove.
Të dy palët apeluan vendimin, prokuroria nuk u tërhoq nga kërkesa për dënimin e tij me 12 vite, ndërsa ish-ministri kërkoi pafajësi të plotë.
/Report.tv
