Seriali i famshëm i Netflix “House of Cards” do të përfundojë me sezonin e tij të gjashtë, ndërsa prodhimi i sezonit final tashmë ka filluar disa javë më parë.
Ky njoftim për përfundimin e serialit, vjen pasi aktori i “Rent”, Anthony Rapp akuzoi Kevin Spacey se e ka ngacmuar seksualisht kur ai ishte vetëm 14 vjeç.
“Ai më kapi sikur dhëndri kap nusen”, tha Rapp, duke theksuar se të dy kishin qenë vetëm në një dhomë gjumi.
“Por unë nuk u largova menjëherë sepse s’po kuptoja “Çfarë po ndodh?” dhe më pas ai u shtri mbi mua, ai po përpiqej të më joshte “, ka thënë aktori.
Spacey lëshoi një deklaratë pasi u botua rrëfimi i Rapp, por ai u përball me një reagim të jashtëzakonshëm pasi shfrytëzoi mundësinë për të pranuar se është homoseksual në vend që të fliste për atë që u akuzua.
“Sinqerisht nuk e mbaj mend këtë përballje, ndoshta mund të ketë ndodhur rreth 30 vite më parë. Por, nëse unë jam sjellë siç e përshkruan ai, i detyrohem një ndjesë të thellë për atë që mund të ketë qenë një sjellje tejet e pahijshme e një personi të dehur. Ndaj më vjen keq që ai e ka bartur këtë barrë për kaq shumë vite”, thotë Spacey.
Kaq mjaftoi për aktorë, regjisorë dhe producentë të tjerë nga “Hollywood”, që të kritikonin deklaratën e tij përmes rrjeteve sociale.
Sezoni i fundit i “House of Cards”, i cili do të lansohet në vitin 2018, do të ketë 13 episode.
