Katastrofa që la pas tërmeti në qendër të Italisë është e tmerrshme! Ndërkohë që numri i viktimave sa vjen e rritet, shumë nga të mbijetuarit janë quajtur me fat që arritën të shpëtoheshin nga rrënojat. Mes të mbijetuarve është edhe aktorja italiane Alexandra Filotei, e cila tregon historinë e saj se çfarë ka përjetuar për 9 orë nën rrënoja.
“I mbaja sytë mbyllur nga frika e asaj që mund të shihja”, thotë Filotei, tani e shtruar në kujdesin intensiv në Ankona, ku arriti në gjendje shoku dhe iu nënshtrua edhe një ndërhyrje kirurgjikale.
“Ndieja erën e gazit dhe merrja frymë. I thashë vetes: Është më mirë të vdesësh në këtë mënyrë, të paktën nuk do shohësh asgjë”, rrëfen aktorja dhe regjisorja 48-vjeçare.
Alexandra Filotei kishte shkuar në shtëpinë e prindërve në Pescara del Tronto, për të kaluar disa ditë pushimi. Nën gërmadhat e shtëpisë humbi jetën nëna e saj Ada, ndërsa babai Martino është plagosur dhe ndodhet në spital në Perugia. Tragjedisë i shpëtuan edhe dy fëmijët e saj.
Burimi: Corriere
