Charlize Theron foli hapur për kohët aspak të qeta kur bënte jetë boheme dhe konsumonte shumë lloje drogërash. Por, jo sepse narkotikët e shtynë drejt depresionit; krejt e kunderta.
Në intervistën e fundit për “Marie Claire”, ylli i kinemasë rrëfeu se kur ishte më e re, kishte një etje të pazakontë për të provuar gjithçka mund t’i dhuronte jeta dhe vetëm pasi provoi gjithçka mundi, u ndje gati për të nisur një jetë më të qetë e për te krijuar familje.
“Të 20-at ia kam dedikuar heqjes së fiksimeve; dëshirës për të eksploruar botën, për të provuar drogërat… të udhëtoja për 4 muaj drejt Turqisë vetëm me një çantë… kështu që i bëra që të gjitha dhe në kohën kur u bëra me fëmijë, isha me të vërtetë gati.”
Sot, 43- vjeçarja është nënë e dy fëmijëve, vajzës August, 3 vjeçe dhe djalit Jackson, 7 vjeç.
“Ndihesha sikur jeta ime ishte një numërim mbrapsht, sikur gjithçka ishte jetë a vdekje.”, shtoi Charlize.
Pas një dekade të shfrenuar në të 20-at, Charlize Theron zgjodhi t’i dedikohej terapisë, për të luftuar pasojat e një fëmijërie aspak të zakontë.
E rritur në një familje plot dhunë, me një baba të alkoolizuar, kur ishte vetëm 15 vjeçe Charlize dëshmoi vrasjen e të atit nga e ëma, e cila po vetëmbrohej pas sulmit të dhunshëm nga ana e bashkëshortit.
“Më bëri të kuptoja se duhet t’i kisha përmbushur disa gjëra, në mënyrë që t’u ofroja një jetë të mirë fëmijëve të mi.”
Javën e kaluar, lajmi se Charlize Theron kishte vendosur ta rriste të birin si vajzë, bëri xhiron e medias. Por, aktorja sqaroi se ky ishte një vendim të cilin Jackson-i e mori vetë.
“Edhe unë mendoja se ai ishte djalë, derisa një ditë më pa në sy dhe më tha: “Unë nuk jam djalë”. Dhe ja, sot jam mama e dy vajzave të bukura”, u shpreh Charlize për “DailyMail”.
