Ajo ka treguar prej kohësh qëndrimin e saj lidhur me çështjen e refugjatëve, por duket se tashmë ka vendosur që të veprojë. Angelina Jolie është prekur shumë nga kriza e refugjatëve sirianë dhe pa asnjë njoftim ka vendosur që të marrë një hap para.
Ajo mbërriti në Greqi aty ku situata duket më problematike dhe emigrantët janë bllokuar prej disa javësh në pritje për të hyrë në Evropën Qendrore dhe Veriore.
Si ambasadore e Komisionarit të Lartë të Kombeve të Bashkuara për Refugjatët, Jolie do të vizitojë Selanikun dhe kampin e Idomenisë, ku ndodhen mijëra refugjatë.
Më herët Jolie ishte në Liban, në kampin e refugjatëve Sant-Nagiel, 15 km larg kufirit me Sirinë.
“Ne nuk mund të menaxhojmë situatën vetëm me ndihmë humanitare, ndërkohë që është e domosdoshme një zgjidhje diplomatike”, tha aktorja.
Angelina duket se nuk ka vështirësi nga kushtet e këqia të motit, për t’i mbështetur moralisht dhe jo vetëm refugjatët. Ajo u bëri thirrje fuqive të mëdha që t’i japin fund luftës në Siri dhe të ndihmojnë miliona njerëz, të cilët kanë marrë rrugën e mërgimit për të shpëtuar.
Jolie tha se qeveritë duhet të analizojë situatën dhe për të kuptuar se çfarë vendi i tyre mund të bëjë, se sa refugjatë mund të ndihmojnë dhe si mund ta bëjnë këtë.
