Javën e kaluar mediat shkruan se, ikja e dritave në Teatrin Kombëtar Eksperimental i kushtoi rëndë një prej aktorëve të mirënjohur. Ishte aktori Alfred Trebicka, i cili gjatë provave për shfaqjen “Medea” pati një incident, por tashmë sqaron se nuk ndodhi për shkak të ndërprerjes së energjisë elektrike.
I ftuar në emisionin “Kush Vjen për Drekë”, Trebicka ka rrëfyer se në errësirë është përplasur me një objekt hekuri dhe që për fat të keq është lënduar aq shumë, sa iu desh të bënte një ndërhyrje kirurgjikale.
“Në momentin e fundit të provës gjenerale për shfaqjen “Medea” u fikën dritat siç ndodh pas shfaqjes dhe një nga objektet e skenës nuk ishte në vendin ku kishte qenë gjithmonë dhe në atë errësirë duke tentuar të dal nga skena u përplasa me atë objekt hekuri. Në momentin e parë nuk mendova se ishte shumë rëndë por pasi u qetësua situata pashë që ishte e nevojshme një ndërhyrje kirurgjikale”, tha Trebicka.
