Një aksident i rëndë rrugor ka ndodhur në verilindje të Brazilit, ku një autobus pasagjerësh është përmbysur, duke shkaktuar vdekjen e 15 personave. Sipas raportimeve të The Guardian, autobusi, i cili po transportonte rreth 30 pasagjerë, ishte nisur nga shteti i Bahias dhe u rrëzua pranë qytetit Saloá, në shtetin fqinj të Pernambucos.
Numri i saktë i të plagosurve ende nuk është konfirmuar, por shumë prej tyre janë dërguar me urgjencë në spitalet e zonës. Sipas policisë lokale, shoferi i autobusit humbi kontrollin e mjetit, kaloi në korsinë e kundërt dhe u përplas me gurët anës rrugës. Ai ka pësuar lëndime të lehta dhe testi i alkoolit ka rezultuar negativ.
Ngjarja është cilësuar si aksidenti më i rëndë rrugor i vitit në Brazil. Guvernatori i Bahias, Jerônimo Teixeira, shprehu ngushëllimet e tij në rrjetin social X, duke thënë se po ndjek nga afër situatën dhe se autoritetet janë të angazhuara në operacionet e shpëtimit dhe identifikimin e viktimave.
Sipas të dhënave që vijnë nga Ministria e Transportit, mbi 10,000 persona kanë humbur jetën në aksidente rrugore në Brazil gjatë vitit 2024. Ky aksident vjen pas disa ngjarjeve tragjike të ngjashme, duke përfshirë edhe ato të ndodhura në muajt prill dhe shkurt.
