Pa “u harruar” ende skandali i patronazhistëve, Agjencia Kombëtare e Shoqërisë së Informacionit është sërish në qendër të vëmendjes. Natyrisht, jo për arritjet e saj “madhështore” në mbrojtjen e të dhënave të qytetarëve.
Prej ditës së djeshme po qarkullon një document me pagat e qindra mijëra qytetarëve. Tashmë ky document po shpërndahet nëpër telefona, në rrjetet sociale e në Whatsapp.
Por këto të dhëna nuk dolën nga hiçi. Inxhinieri i IT, Gent Progni ka thënë në një intervistë për Abc Neës se pagat i ka vetëm Instituti i Kontributeve Shoqërore dhe Drejtoria e Tatimeve dhe të dyja këto i kanë serverat në AKSH.
“Centralizimi i sistemit nga AKSH është deri në nivelin e punësimit të IT, pra duhet ta certifikojnë ata. Serverat janë të centralizuar në AKSH.
Pagat i ka vetëm Instituti i Kontributeve Shoqërore dhe Drejtoria e Tatimeve dhe të dy i kanë severat në AKSH. Nëse IT e një institucioni të tillë, gjeneron të dhëna të tilla, lajmërohet institucioni i AKSHIT. Asgjë nuk del pa e ditur AKSHI. Nëse do bëhej nga jashtë, AKSHI do të njoftonte që ka një data breach, dhe populli do të ishte në dijeni.
Kryqëzimi i të dhënave që është bërë, është alokim që bëhet vetëm aty ku është sistemi qendror. Centralizimi i databazeve, të gjitha mblidhen në E-albania. Aksesimi është bërë në total i databazës, është çështje kohe apo interes momental i grupit që i ka për të vendosur kur publikohen. Dëmi është kolosal”, ka thënë Progni.
Pra, të dhëna të tilla mund të dalin vetëm nga AKSHI, pasi është i vetmi institucion që mund të mbledhë e të eksportojë sasi të tillë të dhënash. Progni ka treguar më tej se edhe nëse diçka e tillë do të kishte ndodhur nga jashtë, apo nëse dikush i brendshëm do të përpiqej të eksportonte të dhëna, AKSHI do të njoftohej automatikisht. Rrjedhimisht, këto të dhëna ose kanë dalë nga aty me vetëdije të plotë, ose AKSH ka mbyllur sy e vesh për dy skenarët e tjerë, që duken më pak të mundur.
Edhe njëherë ky institucion po tregon se nuk është aty aspak për të mbrojtur sigurinë e qytetarëve, por me skandalet që dalin në dritë njëri pas tjetrit vetëm sa i bën hije qeverisë.
Pavarësisht justifikimeve të kryetares së këtij institucioni, Milinda Karçanaj se databaza nuk ka të bëjë me AKSHI dhe reklamimit të punës së tyre, duket se asgjë nga këto nuk është e vërtetë.
Këto të dhëna të publikuara së fundi, dëshmojnë sërish faktin se s ai pasigurt është AKSHI në mbrojtjen e të dhënave personale të qytetarëve.
