Dita e sotme është afati i fundit i përcaktuar nga pushteti lokal dhe qendror, për qëndrimin e banorëve të prekur nga tërmeti në hotele.
Nëse në Shëngjin afati u shty, për shkak të pamundësisë për të gjetur banesa me qira, në Durrës nuk dihet ende se çfarë do të ndodhë.
Qytetarët në Durrës kanë dy probleme, e para nuk gjejnë dot një shtëpi me qira pasi çmimet kanë arritur deri në 350 euro dhe e dyta, pronarët nuk pranojnë të firmosin kontratë për shkak të 15% që duhet t’i paguajnë shtetit.
Disa qytetarë të Durrësit që po qëndrojnë nëpër hotele, kanë shprehur shqetësimet e tyre për “Report Tv”.
“Nuk jam lajmëruar akoma për të ikur, presim. Në bashki të nxjerrin jashtë. Kemi kërkuar banesa me qira, por nuk ka. Ikim në mëngjes dhe vijmë në darkë, gjithë ditën rrugëve. Edhe po na nxorën jashtë do të shkojmë para bashkisë. Pak jemi të strehuar nga tërmeti, por tani edhe këtë….Po kalojmë në depresion, jemi bërë të marrim një gotë helm dhe ta pimë të gjithë më mirë”, tha njëra prej qytetareve.
Një qytetar tjetër tha se do të dalë nga hoteli, vetëm nëse i nxjerr policia me dhunë, pasi nuk ka ku të shkojë.
“Më kanë lajmëruar për t’u larguar sot. Më ka ardhur….mbrëmë në orën 09:00 të darkës, që sot të dalim. Mirë se po dalim por ku do të shkojmë. Bonusi më ka dalë, por duhet tapia e shtëpisë e pronarit, por ku do të shkoj, jam vetë i katërt, qeveria po na jep një tërmet të dytë. Banesa ime doli e pabanueshme nga komisioni. Nuk e di, nuk kemi ku të shkojmë, vetëm kur të vijë policia të na nxjerrë me dhunë. Për ditë kemi kërkuar për banesë me qira, por është e pamundur, janë çmimet e larta, 300-350 euro, është e pamundur. Ne shpresojmë nga shteti. Shteti na futi këtu, tani të marrë masat, jo sa për të larë gojën dhe tani të na nxjerrin jashtë”, tha ai./ gazetareforma
