Muskuj dhe një fizik i formuar, janë ato që bien në sy menjëherë tek Adrian Hadribeaj. Ai prej vitesh ushtron AMP (Arte Marciale të Përziera), më ekstremi i kësaj disipline. Hadribeaj është i vetmi shqiptar që e praktikon AMP dhe menaxherë nga Amerika e Veriut pretendojnë tituj botërorë. 25-vjeçari që prej 4 vitesh ushtron këtë sport ekstrem të dyluftimit në kafaz (octagon). Ai e ka filluar me karate duke përfaqësuar ekipin kombëtar të Shqipërisë.
Po a i bëjnë këta njerëz më të egër lëvizjet e prera dhe adrenalina e ndeshjes? Si fillim mësojmë për rregullin më të fortë në Artet Marciale të Përziera:
-Duhet të bëhesh “selfish” (të jesh vetëm për veten). Kjo nevojitet pasi ky sport kërkon goxha dedikim në mënyrë ekstreme për vetë natyrën që ka.
Sa kohë do fiziku i një sportisti të arrijë të përballojë “Artet Marciale të Përziera”?
-Në këtë sport nuk mund të ngrihesh një mëngjes dhe të thuash: “Ou do shkoj të filloj sportin dhe të ndeshem”. JO. Është gabimi më i madh edhe pse shumë të rinj stresin jetësor duan ta transferojnë dhe të merren me AMP. Pastaj zhgënjehen duke u dëmtuar rëndë nga sportistët cilësorë që i janë dedikuar sportit që në fëmijëri. AMP është duke u bërë dita-ditës “mbretëria” e gjithë sporteve marciale. Çdo profesionist vjen nga një disiplinë tjetër dhe kalon në këtë miksim. Unë përshembull kam ushtruar karate prej 17 vjetësh si kampion kombëtar, ndërkombëtar, evropian dhe botëror medalist. Dmth duhet të jesh i kompletuar prej vitesh që në fëmijëri me sporte të ndryshme.
Me cilën pjesë të trupit është më e vështirë të punohet
-Çdo pjesë e trupit ka karakteristikat e veta, por muskujt e barkut janë më të vështirët për t’u formuar.
Çfarë karakteristikash ka trupi i një sportisti që praktikon këtë lloj sporti?
Çdokush që ndeshet në Artet Marciale të Përziera është atlet dhe ka një disiplinë të shkëlqyer dietike.
Çfarë ndien sapo ngjitesh në ring?
-Sapo vë këmbën aty, them me vete se është koha ime ta shijoj sepse momentet më të vështira janë ato përpara kur trajnohem në stërvitje. Në ato çaste me duket vetja si mbret në ring.
Si janë kundërshtarët e tu?
– Shumë të fuqishëm, nga origjina të ndryshme dhe talente në fusha të tjera si: mundje, boks ose kickbox. Të gjithë përpara ndeshjes janë munduar të më vënë poshtë me fjalë. Më thonin se do më mundnin ose do fitonin, por e kanë parë që ishte e vështirë dhe më pas më kanë respektuar. Tashmë jemi bërë miq.
Si është të luftosh deri në fund edhe pse ndien se mund të dorëzohesh?
-Kjo do zemër mbi të gjitha dhe ajo nuk më ka munguar kurrë edhe pse duke bashkangjitur talentin dhe punën e palodhshme, më kanë bërë të jem i pamposhtur deri më sot dhe të shpallem “Kampion bote” për “TXC 2015”.
Tifozët kur i ke gëzuar më shumë?
– Gjithmonë, sepse asnjëherë nuk i kam zhgënyer, por sigurisht momenti kulminant ishte kur fitova titullin “Kampion bote” dhe ata kanë dikë që të krenohen në këtë sport modern, luftarak dhe burrëror.
Përveç Arteve Marciale të Përziera, çfarë bën tjetër?
-Unë kam hobi futbollin. Luaj herë pas here me shoqërinë. Më pëlqejnë shumë dhe udhëtimet për të eksploruar botën. Koha për një profesionist luftëtar është shumë e ngarkuar në trajnimet e ndryshme që të duhen të praktikosh përditë si sportin e boksit, mundjes, braziljan jiujitsu, karate, kickbox etj. Shumë raste ne mungojmë nëpër festa, ditëlindje e dasma sepse jemi në prag të ndonjë ndeshjeje dhe kalojmë kohën më të madhe duke u ushtruar.
Kur e ndien se po të shtohet numri i fanseve vajza, si e zgjidh këtë punë?
-Ndiehet shpejt, sidomos në ditët e sotme kur rrjetet sociale janë kaq të zhvilluara. Vajzat janë “shpërqëndrim” përpara ndeshjes dhe kënaqësi mbas saj. Mundohem të bëj “balancimin” më perfekt të mundshëm.
Shtator, 2015
“Icon”
