Sot u përcoll për në banesën e fundit, artisti Shpat Kasapi, i cili pak ditë më parë ndërroi jetë pas një arresti kardiak.
Pjesë e homazheve ishte edhe këngëtarja Adelina Tahiri, e cila nuk i mbajti dot lotët në fjalimin e dhënë për kolegun dhe mikun e saj.
“Shpat, o vëlla… Mendova se do takohemi diku, të hamë një drekë bashkë, ashtu si më premtove. Kurrë s’e kam menduar se do të vinte ditë që duhej të të thoja lamtumirën e fundit. Kaq herët, aq padrejtësisht. Të paktën të këndonim edhe një herë në tavolinë, ashtu siç dinim ne. Kaq shumë gjëra na ngelën përgjysmë, kaq shumë fjalë na ngelën pa u thënë.
Pavarësisht emrit tënd të madh, suksesit, talentit dhe gjithçka që ndërtoje me punë, për mua ti do të mbetesh gjithmonë Shpati me zemër të pastër dhe buzëqeshje të bardhë, ashtu siç të njohëm të gjithë, i dashur, i butë, i qetë dhe me plot shpirt. E deshe muzikën me gjithë qenien tënde dhe unë dua të besoj se sot, atje lart ti po këndon me engjëjt, me atë zërin tënd që preke pafund zemra.
Të gjithë jemi udhëtar të asaj rruge. Një ditë do vijmë edhe ne. Edhe atë ditë, do këndojmë bashkë, ashtu siç më premtove. Ngushëllimet më të sinqerta për të gjithë të pranishmit”, tha ndër të tjera artistja.
