Kryeministri Rama ka paralajmëruar më herët se do të ketë proçedim penal për këdo që abuzon me çmimet e barnave apo ushqimeve.
Ky rregull duket se nuk është zbatuar në Durrës, pasi në dy farmaci të qytetit ende abuzohej me çmimin e dezinfektantëve.
Kështu, policia ka proceduar penalisht dy pronarë farmacish, S. L dhe E. D.
Në farmacitë e tyre u sekuestruan një sasi disifektantësh për duart pa faturë tatimore, të cilët shiteshin me çmime abuzive.
Njoftimi i policisë:
Strukturat e DVP Durrës, kontrolle të befasishme në të gjitha farmacitë, për parandalimin e tregtimit të medikamenteve me çmime abuzive dhe fshehjes së të ardhurave. Finalizohet operacioni i koduar “Medikamenti”. Procedohen penalisht 2 pronare të farmacive, për veprën penale “Fshehja e të ardhurave”. Specialistët për Hetimin e Krimit Ekonomik dhe Financiar në Drejtorinë Vendore Durrës, në zbatim të masave të përcaktuara në Planin e Masave për parandalimin, evidentimin dhe goditjen e rasteve abuzive të tregtimit të medikamneteve me çmime të rritura fiktivisht, duke përfituar nga situata emergjente e COVID-19 që po kalon vendi, si dhe fshehjen e të ardhurave të përfituara nga abuzimi me çmimet, kanë organizuar dhe finalizuar operacionin policor “Medikamenti”, në kudër të të cilit u proceduan penalisht 2 shtetase, pronare të farmacive dhe konkretisht shtetaset: S. L., 32 vjeçe, banuese në Durrës dhe E. D., 40 vjeçe, banuese në Shijak, Durrës.
Gjatë kontrollit të ushtruar në farmacinë në lagjen Nr. 13, u gjetën dhe u sekuestruan një sasi disifektantësh për duart (xhela antibacterial), pa faturë tatimore, të cilët shiteshin me çmime abuzive, si dhe në farmacinë në lagjen Nr. 4, u konstatuan shitje pa kupon tatimor. Kontrollet e befasishme do vijojnë në të gjithë qarkun, për parandalimin dhe goditjen e paligjshmërisë dhe përfitimit nga situata e krijuar duke abuzuar me çmimet jo vetëm të medikamenteve, por të çdo produkti për konsum nga qytetarët. Materialet i kaluan Prokurorisë së Rrethit Gjyqësor Durrës, për veprime të mëtejshme.
Deri tani, numri i të prekurve nga koronavirusi në vendin tonë ka shkuar në 38, ndërsa qeveria ka marrë masat e nevojshme për të parandaluar përhapjen e mëtejshme të kësaj epidemie.
