Heshtja e ministres së Arsimit për përdhunimin e një 15-vjeçareje nga roja i shkollës dhe disa adoleshentë, është e pafalshme!
Kështu është shprehur avokatja Denisa Daka në RTV ORA, e cila shtoi se ka edhe një ligj të posaçëm në lidhje me arsimin parauniversitar që u cakton autoriteteve detyrimin për të mbrojtur fëmijët nga të gjitha format e dhunës.
Avokatja tregoi se ka një ligj të caktuar që i detyron organet e qeverisjes vendore për të caktuar roje publike në shkolla, por ata janë vendosur përtej çdo kriteri të arsyeshëm, duke mos u parë personaliteti i tyre.
Denisa Daka: Ka edhe një ligj të posaçëm në lidhje me arsimin parauniversitar dhe u cakton autoriteteve detyrimin për të mbrojtur fëmijët nga të gjitha format e dhunës, dhe ka një ligj të caktuar që i detyron organet e qeverisjes vendore për të caktuar roje publike në shkolla, por ata janë vendosur përtej çdo kriteri të arsyeshëm, duke mos u parë personaliteti i tyre në shumë raste dhe kanë sjellë një dëm të madh në publik.
Prindërit nuk kanë më sigurinë dhe jemi të shqetësuar nga e gjitha kjo që po ndodh. Unë e konsideroj të pafalshme heshtjen e ministres së Arsimit, e drejtorisë vendore arsimore, e kryetarit të parlamentit, e deputetëve përkatës.
Moskallëzimi i krimit cilësohet vepër penale. Askush nga mësuesi, prindërit apo fqinjët nuk e dinë se është vepër penale. Kjo ka qenë domosdoshmëri kahera që të futet edukimi ligjor dhe seksual në shkolla.
