Shqipëria performoi dje në gjysmëfinalen e dytë të “Eurovision”-it, e përfaqësuar nga këngëtarja Eneda Tarifa.
Kënga “Fairytale” nuk arriti të kualifikohej në finalen e madhe të “Eurosong”-ut në Stokholm. Ajo priti verdiktin me shumë emocion, por Shqipëria nuk arriti të hynte në listën e të kualifikuarve.
Përfaqësuesja jonë këndoi e 17-a në radhë dhe u prit me brohoritma nga të pranishmit në sallë, pjesa më e madhe e mbështetësve shqiptarë. Por ajo nuk arriti të siguronte finalen që do të mbahet të shtunën.
Kënga me të cilën Shqipëria u prezantua është cilësuar si një këngë e fuqishme dhe u realizua mjaft mirë nga Eneda, vokali i së cilës është vlerësuar që me daljen e parë në skenë në vitin 1997.
Shtetet e kualifikuara ishin Letonia, Gjeorgjia, Belgjika, Australia, Ukraina, Bullgaria, Serbia, Polonia, Izraeli, Lituania dhe Belgjika. Votimi është bërë nga publiku i shteteve pjesëmarrëse në gjysmëfinalen e dytë dhe nga juritë profesionale të çdo shteti (50-50).
Kënga “Përrallë” ishte krijuar nga kompozitorja dhe tekstshkruesja e re, Olsa Toqi. Tarifa realizoi një performancë të saktë vokale, por një pjesë shumë e veçantë e saj ishte edhe klipi prezantues i Shqipërisë. Në këtë klip shfaqej Eneda, bashkë me vajzën e saj 3-vjeçare, Arian.
Të shumtë ishin këngëtarët që e mbështetën dhe i uruan sukses Enedës, mes tyre ish-përfaqësuesit e Shqipërisë në “Eurovision”, Rona Nishliu, Aurela Gaçe, Eranda Libohova, Sidrit Beljeri.
*Performanca e saj natën e 12 majit, gjysmëfinalja e dytë e “Eurovision”-it
