Situata duket tejet alarmante në vendin tonë, ku çdo ditë vendosen rekorde të reja infektimesh nga Covid-19, dhe ditën e sotme u raportuan 545 raste të reja.
Rritja e numrit të të infektuarve nga pandemia e koronavirusit në vendin tonë, ka nxitur qeverinë të ndërmarrë masa shtrënguese, por të gjithë i trembemi mbylljes totale.
Ditën e sotme kreu i Urgjencës Kombëtare dhe anëtari i Komitetit Teknik të Ekspertëve Skënder Brataj ka folur në një intervistë për Top Channel, lidhur me masat që pritet të vendosen në javët e ardhshme.
Brataj tha se vendi mund të ketë kufizim oraresh ose mund të mbyllet në fundjavë, nëse vazhdohet me këto shifra, duke shtuar se ende nuk është marrë në shqyrtim mundësia për mbylljen e vendit për disa javë:
Do të kalojmë ose në kufizim oraresh mbyllje fundjavash ose një mbyllje për disa javë sic po e bënë bota, por që nuk e kemi marrë në konsideratë. Duhet të ruajmë një ekuilibër”.
Ai tha se vetëm me bashkëpunimin e qytetarëve mund të shmanget mbyllja e vendit:
Këto numra që shohim sot, mbas tre javësh do të kemi më shumë pacientë në spitale. Ndaj nuk duhet të gjendemi të papërgatitur. Kemi nevojë për qytetarët, për zbatimin e masave”– u shpreh Brataj.
Masat e vendosura deri tani janë:
Ndalohet lëvizja e qytetarëve nga ora 22:00-06:00 në të gjithë vendin, me përjashtim të lëvizjes për motive pune, emergjenca shëndetësore apo nevoja të domosdoshme.
Ndalohen aktivitetet e bareve – restoranteve nga ora 22:00 – 06:00 (përveç shërbimit delivery. Ndërsa administrata duhet të punojë nga shtëpia gjatë kësaj kohe.
Maska e detyrueshme në çdo ambient përveç shtëpisë.
Ndalohen grumbullimet me më shumë se 10 persona në vende të hapura dhe të mbyllura.
Ndalohen mbledhjet partiake dhe tubimet.
Konferencat, ceremonitë e festave, ceremonitë martesore dhe organizimet përtej familjare të ceremonive mortore, deri në një urdhër të dytë.
