Ndërkohë që na ndajnë vetëm pak ditë nga rihapja e shkollave në vend, një pjesë e madhe e nxënësve nuk ndihen ende gati për t’u rikthyer në ambientet e tyre. Rritja e shifrave nga pandemia e Covid-19 është shoqëruar me frikë më të madhe, ndaj disa vende po mendojnë që të shtyjnë nisjen e vitit të ri shkollor.
Drejtues të disa shkollave në Itali kanë ngritur alarmin për rikthimin e nxënësve nëpër banka, sepse sipas tyre nuk janë plotësuar ende disa kushte bazë për ruajtjen nga koronavirusi. Ata e shikojnë si shumë të vështirë mundësinë e hapjes së shkollave në 14 shtator, ndaj në 7 rajone është vendosur që kjo datë të shtyhet me 1 javë.
“Është e qartë se disa probleme duhet të zgjidhen që shkollat të rihapen të sigurta. Siç e dimë dërgimi i bankave një-vëndëshe nëpër shkolla, të vetmet që garantojnë distancimin, po bëhet me shumë vonesë. Dy kritere të tjera të rëndësishme janë: klasat, që në disa vende nuk ka mjaftueshëm të tilla dhe shpërndarja e stafit, apo ndryshe e mësuesve që duhet të punësohen për të siguruar këtë shërbim”, është shprehur Antonello Giannelli, Presidenti i Shoqatës Kombëtare të Provimeve.
Nga ana tjetër edhe Greqia u detyrua në fillim të shtatorit që të shtynte hapjen e shkollave, për shkak të rritjes së numrave të të prekurve nga Covid-19. Po ashtu Maqedonia e Veriut mori të njëjtin vendim dhe ende mbetet në pikëpyetje hapja e shkollave në këtë periudhë.
Të gjithë fqinjët kanë vendosur e menduar të njëjtën gjë, ndërsa autoritetet shqiptare duket se nuk lëkunden aspak nga shifrat e koronavirusit, që nuk po njohin zbritje prej muajsh. Ditën e sotme kryebashkiaku Erion Veliaj, lajmëroi përmes një postimi në rrjete sociale se ka nisur dezinfektimi në të gjitha shkollat e Tiranës, por a është kjo e mjaftueshme për të siguruar të gjithë nxënësit, prindërit e mësuesit se rikthimi në ambientet e shkollës nuk do i rrezikoj nga virusi?
Italia, një shtet shumë herë më i zhvilluar se vendi ynë, ngre alarmin se ka mungesë klasash e bankash për të siguruar distancimin mes nxënëseve. Përderisa fqinjët nuk munden ta sigurojnë këtë gjë, a i kemi ne kapacitetet për ta realizuar mësimin me këto kushte? Një pjesë e mirë e shkollave në vend, qëkur Covidi nuk ekzistonte as si koncept, kanë zhvilluar mësimin me turne e megjithatë sërish ka pasur mbingarkesë në klasa. Tashmë që duhet vendosur edhe një lloj distance mes nxënësve as që imagjinohet se sa e vështirë do të jetë që të gjenden mjaftueshëm klasa për të realizuar mësimin në ambientet e shkollave. Pastaj as që duhet menduar një skenar më i mirë në shkollat nëpër rrethet e Shqipërisë, ku gjithmonë ka pasur problematika të këtij lloji edhe në kohën kur kemi qenë të lirë nga koronavirusi,
Stafi në shkolla
Gjithashtu Italia ngre shqetësimin se në disa shkolla nuk ka mjaftueshëm staf që duhet të sigurohet për zbatimin e rregullores anti-Covid. Në udhëzuesin e publikuar disa javë më parë nga Ministria e Shëndetësisë në Shqipëri, thuhej se nxënësit duhet të shoqërohen në tualet nga një person tjetër, pa e specifikuar se cili do të jetë mbikëqyrësi. Është e pamundur që një mësues të zhvillojë orën e mësimit e në të njëjtën kohë të shoqërojë nxënësit në tualet, ndaj pritet të shohim nëse ministria do të ketë menduar për të punësuar një staf tjetër shtesë për të realizuar vetëm këtë pikë të udhëzuesit.
Masat në shtetet fqinje
Shtetet fqinje që janë shprehur të shqetësuar për hapjen e shkollave, kanë vendosur që prindërve t’ju lehtësojnë një pjesë të barrës. Në Greqi ministri i Brendshëm njoftoi se do të sigurohen përmes autoriteteve lokale maska falas për të gjithë nxënësit e mësuesit, ndërsa në Itali u lajmërua se janë marrë 11 milionë maska për të gjithë ata që do të rikthehen në ambientet e shkollave. Diçka e tillë jo vetëm që nuk bëhet në Shqipëri, por as që merret parasysh nga qeveria.
Përderisa të tilla mungesa kaq thelbësore për këtë kohë që po jetojmë po alarmojnë edhe fqinjët tanë, të cilët janë shumë më të përparuar në arsim e mjekësi, do të thotë se ne jemi dyfish të rrezikuar nëse hapim shkollat. Epidemiologët janë shprehur qartë se vala e dytë e koronavirusit në vjeshtë është gati e pashmangshme, ndaj ky është një faktor tjetër që e bën akoma më të vështirë rikthimin në institucionet arsimore.
A nuk do të ishte më mirë që qeveria ta mendonte si mundësi mësimin “online”, por këtë herë me një program më të detajuar, për të shmangur çdo mangësi që solli ndjekja e një procedure të tillë në fillim të pandemisë? Nxënësit, mësuesit e prindërit mbetën të pakënaqur nga mësimi online disa muaj më parë, por nëse autoritetet tona do të mendonin që të siguronin mjete elektronike për të gjithë e do të ndiqnin shembujt e vendeve të tjera që e kanë ndjekur si praktikë shumë kohë më parë, me siguri edhe kjo metodë do të rezultonte mjaft efektive.
/Iconstyle.al
