Në Shqipëri mungon plazma hiperimune, e cila mund t’i kishte shpëtuar jetën skulptorit të njohur Arben Bajo.
Kështu u shpreh mjeku shqiptar në Itali, Shpëtim Baçi, i cili jep shërbimin e tij si bluzë e bardhë në Spitalin e Parmës.
Në lidhje direkte me Syri Tv, ai tregoi se çfarë është plazma hiperimune, e cila ndihmon të sëmurët me COVID-19, dhe rastet e pashpresa që t’ia dalin, fakt ky për të cilin iconstyle.al ka kohë e ka ngritur si çështje (Lexo këtu).
Ja çfarë thotë mjeku për plazmën
“Plazma hiperimune merret nga njerëz të cilët e kanë kaluar sëmundjen dhe kanë antikorpe në trupin e tyre në mënyrë të tillë që më pas t’u dhurohet të sëmurëve me sëmundje me koronavirus. Por duhet të dimë diçka, që jo të gjithë kanë antikorpe për të dhuruar. Pra para se të dhurohet plazma duhet të bëhet testimi kush i ka këto antikorpe. Dhe minimalisht duhet 14 ditë që të mos ketë shenja të infeksionit. Çdo pacient që ka kaluar koronavirusin mund të dhurojë deri në 600 miligramë, ose dy herë në muaj, 1200 miligramë. Plazma në vetvete përmban imunoglobinë që ndihmon për të kuruar sëmundjen. Por edhe kjo është një strategjii, por nuk shërben te të gjithë”.
Po në rastin e skulptorit a mund të kishte shpresë?
Për këtë rast, mjeku shqiptar u shpreh se duhet ta vlerësonin mjekët e Spitalit Infektiv nëse duhej dhënë apo jo plazma immune. Dhe në fakt, një ditë para se Arben Bajo të ndërronte jetë, miqtë e tij artistë shpërndanë një njoftim me urgjencë në rrjetet sociale për gjak A negativ nga një person që e kishte kaluar COVID-19. Ata kërkonin gjak për të shpëtuar jetën e skulptorit!
Ky veprim erdhi vetëm pas përkeqësimit të gjendjes së tij në spitalin e Infektivit, dhe duhet të pranojmë se fatkeqësisht, përpjekjet e vendit tonë në këtë drejtim lënë për të dëshiruar.
Çdo minutë që kalon vret më shumë. Shefi i laboratorit të mikrobiologjisë në QSUT, Andi Koraqi, pranoi më parë në një intervistë për RTV Klan se Shqipëria është e vonuar në këtë drejtim, por shtoi se thjesht është në plan për të filluar si praktikë dhe nuk ka ende asnjë detaj tjetër.
Pyetja e madhe në këtë rast është KUR do nisin përpjekjet?
I kontaktuar nga “iconstyle.al”, epidemiologu Ilir Alimehmeti tha pak ditë më parë se: “Shqipëria ka mundësi ta realizojë diçka të tillë por kjo varet nga dhurimet e plazmës, dhe dhurimet e gjakut dhe të plazmës janë historikisht minimale në Shqipëri. Pra, teknika është e mundur por dhurimet do hasin në vështirësi” (lexo këtu)
Prandaj është koha për ndërgjegjësimin e të gjithë njerëzve për nevojën e përdorimit të plazmës. Sa i përket efikasitetit të saj tek të infektuarit me virus, mjeku Baçi shprehet se në Itali me plazmoimunen ka patur shumë sukses dhe për më tepër as nuk kushton:
“Plazma imune mund të pëdoret në fazën e fillimit të sëmundjes, kur mushkëria nuk është dëmtuar. Por kur i sëmuri është në gjendje të rëndë, i duhet dhënë një shans. Kjo plazmë nuk ka kosto. Ka më shumë kosto ilaçet se sa plazma.
Por duhet parë gjithmonë sasia e antikorpeve të atij që e dhuron. Sa më të larta antikorpet, aq më mirë për të sëmurin. Pra jo të gjithë që e kanë kaluar, kanë sasinë e duhur të antikorpeve. Edhe në Shqipëri duhet që dalëngadalë të fillojë kjo strategji kurimi.
U bëj thirrje shqiptarëve, të dhurojnë gjak. Kush nuk ka sëmundje shoqëruese, të vejë të dhurojë. Të mos presë që shëndetësia t’u thotë hajde të dhuroni”.
/Iconstyle.al
