Studiuesit kinezë kanë zbuluar se koronavirusi mund të vijojë të qëndrojë në spermën e burrave edhe pasi të kenë filluar të shërohen nga infeksioni, duke ngritur mundësinë që ai të transmetohet seksualisht.
Në një studim të vogël, mostrat nga 38 pacientë meshkuj që u trajtuan në Spitalin Komunal në Shangqiu u analizuan nga një ekip në kulmin e shpërthimit në Kinë.
Njëzet e tre pacientë ishin në fazën e rikuperimit, ndërsa 15 ishin në fazën akute të infeksionit.
Raporti, botuar nga revista JAMA Network Open, tregoi se rreth 16 përqind e burrave kishin gjurmë të COVID-19 në spermën e tyre.
Virusi u gjet në spermën e katër prej 15 pacientëve që ishin në fazën akute të infeksionit dhe në dy nga 23 pacientët që ishin duke u shëruar.
“Ne zbuluam se SARS-CoV-2 mund të jetë i pranishëm në spermën e pacientëve me Covid-19 dhe SARS-CoV-2 mund të gjendet ende në spermën e pacientëve që shërohen”, thanë studiuesit.
Studiuesit kërkuan që të bëhen më shumë kërkime pasi transmetimi seksual “mund të jetë një pjesë kritike e parandalimit”, veçanërisht sepse u gjetën gjurmë të virusit në pacientët e shëruar.
“Mbrojtja ose përdorimi i prezervativit mund të konsiderohen si mjete parandaluese për këta pacientë,” vunë në dukje autorët.
/The Independent
