“Oktoberfest” do të mbahet sërish këtë vit në kryeqytetin bavarez Mynih pas një pauze dyvjeçare të shkaktuar nga pandemia e koronavirusit.
Duke njoftuar rifillimin e festivalit, kryebashkiaku i Mynihut Dieter Reiter tha se e kishte pasur të vështirë të merrte vendimin për shkak të luftës në Ukrainë, gjë që mund t’i bënte festime të tilla të dukeshin të papërshtatshme.
Ai tha se nuk do të vendosen kufizime për koronavirusin për vizitorët pasi nuk kishte bazë ligjore për ta bërë këtë.
Festivali do të zgjasë nga 17 shtatori deri më 3 tetor.
Reiter shtoi se ai shpresonte se asgjë nuk do të ndodhte për ta bërë të nevojshme një anulim tjetër.
Pati thirrje nga shumë qarqe për të lejuar që festivali të zhvillohej sërish këtë vit, duke përfshirë nga kryeministri i Bavarisë, Markus Söder, organizatorët e festivalit dhe politikanët lokalë të Mynihut.
Në vitin 2019, herën e fundit që u zhvillua festivali, 6.3 milionë pjesëmarrës kanë pirë 7.3 milionë litra birrë, sipas bilanceve të birrarive.
Festivali është anuluar vetëm 26 herë në dy shekuj të ekzistencës së tij. Shumica e anulimeve ishin për shkak të luftës, por shpërthimet e kolerës ishin fajtore dy herë.
Mbështetësit e rifillimit të festivalit janë përballur me kritika për përshtatshmërinë e festivalit gjatë konfliktit në Ukrainë, duke pohuar se “Oktoberfest” është një kontribut për mirëkuptimin ndërkombëtar për shkak të vizitorëve nga kaq shumë vende.
