Kurora e vajzës më të bukur të Shqipërisë në vitin 2010, ishte një çelës për vajzën me origjinë nga Korça, Nevina Shtylla, që të depërtonte thellë në botën e televizionit. Por më tepër sesa bukuria, Nevina vërtetoi se pjesëmarrja në “Këngën Magjike” përkrah moderatorit Ardit Gjebrea, prezantimi në “Netët e klipit shqiptar”, në “Mad Geeks” në Mad Tv, në emisionin “Next” në Vizion Plus, si dhe roli i fundit në një film, kërkonin më tepër sesa bukurinë fizike të saj. Si një vajzë e zgjuar, me ambicie dhe e përkushtuar në projektet që ndërmerr përsipër “me ndershmëri”, siç thotë ajo në një intervistë për “ICONstyle”, Nevina beson se në të ardhmen e presin gjëra të mira.
Zbulimi më i ri i saj është aktrimi, një eksperiencë që i ka ndryshuar rrjedhën e jetës dhe i ka hapur shumë dyer. Pjesëmarrja në filmin “Ti mund të më quash Xhon”, ku luan rolin e një adolesheteje, të llastuar, kokëfortë dhe aventuriere, Nevina e sheh si një sfidë për t’u përmirësuar edhe më tej. Duke qenë se ajo e cilëson veten “fëmijë në shpirt”, Nevina beson se pika e saj e fortë është origjinaliteti dhe natyrshmëria me të cilën ka luajtur rolin në film. Natyrshëm e ka luajtur edhe rolin e Lornës, edhe pse shpesh i është dashur të dëgjojë edhe komente të tipit: Nuk e kishin problem prindërit e tu puthjen në film? Dhe përgjigja e saj ka qenë gjithnjë e njëjtë: Puthja në kinematografi është diçka shumë e zakonshme ashtu siç është në realitet.
Intervista e plotë me Nevina Shtyllën:
Keni provuar eksperienca të ndryshme, mes të cilave modelingun dhe moderimin. Si e sheh veten në aktrim duke qenë se “Ti mund të më quash Xhon” është filmi i parë për ty?
Jam ndjerë shumë mirë në këtë rol që besoj se edhe më përshtatej shumë. Them se e kam realizuar me sukses dhe për këtë më është dashur të punoj vërtet shumë. Ka qenë një eksperiencë që padyshim do të mbetet gjatë në memorien time dhe e them me plotë gojë se më ka ndryshuar rrjedhën e jetës, jo vetëm në mënyrën sesi i perceptoj gjërat tani por edhe nga ana profesionale më ka hapur shumë dyer.
Në trailerin e filmit pamë që Nevina luan rolin e një “vajzë me probleme”, që dashurohet dhe përfundon në telashe të tjera edhe më të mëdha. Si mund ta përshkruani rolin tuaj në këtë film?
Lorna, personazhi të cilin unë interpretoj, është një vajzë e komplikuar por në fund të fundit ajo është një adoleshente si gjithë të tjerat në ditët e sotme. Është një vajzë me zemër të madhe, kokëfortë, e llastuar, guximtare dhe mbi të gjitha aventuriere. Tek ajo bashkohen disa tipare të larmishme që e bëjnë Lornën shumë të veçantë. Jam dashuruar me këtë personazh që në leximin e parë të skenarit.
Çfarë të pëlqen dhe çfarë nuk të pëlqen te ky rol?
Nuk do të ndryshoja asgjë tek roli. Por do të ndryshoja pjesërisht ndonjë gjë të vogël tek vetja. Kjo ishte eksperienca ime e parë në aktrim dhe kurrsesi nuk mund të them se tani unë jam një aktore e mirëfilltë. Jo, kam ende shumë punë për të bërë, por për fatin tim të mirë arrij të mësoj shumë shpejt. Duke qenë se premiera ishte e sukseshme, kam arritur të marr edhe kritikat e nevojshme. Kam marrë shumë komente pozitive që mbi të gjitha vlerësojnë origjinalitetin dhe natyrshmërinë me të cilën e kam luajtur rolin, kështu që kjo është një gjë, që nuk do të doja ta ndryshoja kurrë tek vetja.
Si e kanë pritur familjarët apo miqtë e tu pjesëmarrjen në filmin “Ti mund të më quash Xhon”?
Mbështetja nga miqtë dhe familja mbi të gjitha, ka qenë jashtëzakonisht e madhe. I falënderoj shumë të gjithë për suportin dhe ndihmën që më kanë dhënë. Ishte një rol që përfshinte skena si psh puthjet, që çuditërisht ende quhen tabu për shqiptarët. Shpesh kam marrë komente të tipit: Nuk e kishin problem prindërit e tu këtë? Dhe përgjigja ime ka qenë gjithnjë e njëjtë: Ndoshta prindërit e mi janë më me këmbë në tokë, madje më shumë sesa shumë të rinj në kohën e sotme. Puthja në kinematografi është diçka shumë e zakonshme dhe ata e kuptojnë shumë mirë këtë. Sikurse e dinë se edhe në realitet, puthja nuk është diçka e ndaluar.
Cili është filmi (filmat) jot i preferuar?
Filmat e preferuar për mua janë shumë, përgjithësisht pëlqej zhanrin komedi por pa lënë pas edhe kategoritë e tjera. Jam një fëmijë i përjetshëm në shpirt e prandaj edhe filmat animacion janë shumë të pëlqyer nga unë. Një nga filmat më të fundit që kam parë e më ka bërë përshtypje është “La La Land”. Realizimi ishte fantastik si dhe kolona zanore ishte e mrekullueshme.
Ku e gjen veten më shumë si modele, prezantuese apo aktore?
Është e vështirë ta gjej veten tek modelingu e prandaj rastet kur unë e kam bërë këtë kanë qenë jashtëzakonisht të rralla dhe vetëm për emra te rëndësishëm e që ja kanë vlejtur vërtet. Moderimi ka qenë dashuria ime e parë nga e cila ende nuk jam gati të ndahem, përkundrazi uroj të hedh hapa të tjerë me përgjegjësi edhe më të mëdha. Ndërsa aktrimi është një zbulim i ri për mua. Deri tani perspektiva duket e pasur me mundësi të reja kështu që do t’i mbetet kohës për të zbuluar se ku do të më çojë më tej kjo fushë.
Çfarë të pëlqen më shumë te profesioni i moderatores?
Është një peshë e madhe dhe fat mbi të gjitha, që të kesh mundësi të japësh edhe ti zërin tënd dhe idetë e tua në publik. Duke qenë prezantuese unë jam një faktor që ndoshta do të ndikojë për mirë sidomos tek brezat e rinj. Mundohem të jap një shembull pozitiv. Për më tepër kush nuk do ta donte të gjithë vëmendjen që të jep televizioni? Sigurisht kjo nuk është arsyeja kryesore përse unë e bëj këtë gjë, por është një nga shumë të mirat që vijnë me të.
Paraqitja fizike është primare për TV. Sa rëndësi i kushton asaj në jetën e përditshme? Pa cilat produkte bukurie nuk bën dot?
Paraqitja ndoshta të ndihmon por është puna dhe ambicia ajo që vërtetë të japin sukses. Sidoqoftë pamja e jashtme është prezantimi i parë kështu që ka rëndësinë e vet. Në ekran dhe në evente të tjera që lidhen me këtë profesion që unë kam, jam e detyruar të kurohem dhe të kem një paraqitje që përputhet me disa kritere të caktuara. Por në jetën time të përditshme zgjedh gjithmonë xhinset, atletet dhe rehatinë. Një nga ato produkte pa të cilat unë nuk bëj dot, pavarësisht situatës është parfumi. Parfumi është si një pjesë e pandarë e imja.
Sa rëndësi u kushton markave origjinale?
Nuk jam maniake e brand-eve të njohura. Sigurisht që kam edhe unë disa aksesorë apo veshje që janë të një marke të caktuar por nuk është se ndihem keq edhe pa to. Besoj se njeriun e zbukurojnë të tjera gjëra, jo emri i një personi tjetër që është bërë i njohur për shkak të talentit të vet personal.
Cili është projekti i radhës i Nevinës?
Projektet e radhës për mua janë të shumta, si në televizion ashtu edhe në kinematografi apo dhe në jetën time personale. Nuk do të doja të zbuloja asgjë. Kur të jetë momenti i duhur, do të zbulohen të gjitha.
Ku e sheh veten pas 5-10 vjetësh?
Ne kaq vite që unë ndjek rrugën e televizionit, e kam vërtetuar shpesh herë se asnjëherë nuk i dihet çfarë rezervon e ardhmja. Nuk di të them ekzaktësisht se ku e shoh veten pas 5-10 viteve, por besoj se vetëm gjëra të mira më presin.
Burimi: ICONstyle
