Beyonce dëshmoi së fundmi se shtatzënat nuk ka pse t’i binden stilit tradicional. Dhe deputetja e Partisë Demokratike, Jorida Tabaku, duket se e di shumë mirë vlerën e kësaj ideje.
Vetëm pak ditë më parë politikania vendosi të zyrtarizonte lajmin e pritjes së saj të ëmbël, duke ekspozuar barkun e rrumbullakosur. Tashmë dashurisë 17-vjeçare të saj me bashkëshortin Saimir Sallakun, kurorëzuar prej kohësh në martesë, do t’i shtohet edhe bekimi i madh siç është të pasurit fëmijë.
Jorida së shpejti do të bëhet nënë për herë të parë, e dy vajzave binjake. Ndërsa ndodhet në muajin e pestë të shtatzënisë, deputetja e opozitës ka ditur të përdor veshjen për të mbuluar “sekretin” e saj.
Ndërsa kthehemi tre muaj më parë, mund të dallojmë nga fotot e Joridës se shtatzënia nuk ia ka ndryshuar stilin e veshjes. Fustanet njëngjyrëshe vazhdonin të ishin zgjedhja e saj për t’u paraqitur në mbledhjet e komisioneve apo në Parlament.
Veçantia e stilit të saj qëndron te zgjedhja e detajeve. Stili i Joridës duket se është i tillë: tërheqjen e vëmendjes do ta bëjë dizajni ose elementët e veçantë në veshjen e saj.
Ajo ka qenë gjithmonë besnike e klasikes, por të ndërthurur me modernen. Angazhimi i saj mbetet politika, por të ndjekësh modën dhe të kujdesesh për imazhin, është një përkushtim i rëndësishëm për çdo femër, pavarësisht pozicionit që mban.
Me kalimin e javëve dhe rritjen e barkut, Jorida vendosi që të shfaqej me pallto dhe fustane të gjera.
Në varësi të angazhimit të ditës, politikania përshtat edhe veshjen e saj, klasike ose sportive. Në rrugët e kryeqytetit për të biseduar me qytetarët lidhur me shqetësimet e tyre, mund ta shihnit me xhinse, pallto dhe këpucë pa takë.
Ndërsa në takimet e rëndësishme, zgjedh të jetë “chic” me fustanet e lirshme dhe këpucët klasike me pak takë.
Aksesori i saj i pandarë është ora, ndërkohë që vazhdon të ruaj të njëjtën linjë për bukurinë natyrale, flokët gështenjë me pak onde dhe një makijazh të lehtë, me theks ndonjëherë te buzët.
*Shfleto galerinë
Burimi: Iconstyle.al
