Ju ka ndodhur të bëni pazar këto dy ditët e fundit dhe shitësi t’ju ketë thënë se, “nëse dëshironi një qese për të vendosur produktet që keni blerë, duhet ta paguani”. Nisma nuk është marrë nga vetë bizneset shqiptare, por nga Bashkia e Tiranës, e cila vendosi që qeset plastike të kenë një kosto: Qeset e vogla do të kushtojnë 3 lek dhe qeset e mëdha 5 lek.
Kjo nismë e re synon t’i shtyjë qytetarët drejt përdorimit të çantave të tyre vetjake (trastave), në vend të qeseve plastike, për një kryeqytet më të pastër.
Në fakt kjo nismë është ndërmarrë prej vitesh nga vende të ndryshme të botës. Qytet pas qyteti dhe shtet pas shteti kanë marrë masa kundër qeseve plastike.
Këto shtete kanë vendosur taksa ose kanë ndaluar qeset plastike, ndërsa disa prej tyre presin ta vënë në zbatim këtë nismë. Kjo është një formë sesi bota po mbështet njëra-tjetrën kundër efektit dhe dëmit negativ, që vjen nga volumi i madh i qeseve plastike çdo vit.
Danimarka
Danimarka në vitin 2003 vendosi një taksë për shitësit për të dhënë qese plastike. Kjo inkurajoi dyqanet të taksonin blerësit për qeset plastike dhe shtyu në përdorimin e qeseve me disa përdorime. Kjo mendohet se shpëtoi rreth 66% të qeseve palstike.
Irlanda
Irlanda vendosi një taksë 0.15 euro në mars të 2002-s. Pasi iu vendos konsumatorit në pikën e shitjes, kjo bëri që 90% të konsumatorëve të përdorinin trastat. Taksa u rrit me 0.22 euro në vitin 2007. Të ardhurat janë vënë në shërbim të Fondit të Mjedisit.
Italia
Italia në janar të vitit 2011, ndaloi shpërndarjen e qeseve plastike që nuk janë në mbrojtje të mjedisit. Të gjitha dyqanet vendosin në dispozicion qeset plastike kundrejt një kostoje.
Gjermani
Të gjitha dyqanet në Gjermani që mundësojnë qese plastike duhet të paguajnë një taksë riciklimi.
Angli
Në Angli, që nga tetori i 2015-s, qeveria vendosi që të aplikojë çmimin për shitjen e qeseve nga kompanitë me mbi 250 punonjës. Kompanitë e vogla ushtruan presion në adaptimin e kësaj kostoje, por ende nuk ka një vendim. Sipas raportimeve të fundit, përdorimi vjetor i qeseve plastike shkon afërsisht në 7 miliardë.
SHBA
Nga korriku i 2013-s në Shtetet e Bashkuara të Amerikës, 17 shtete dhe 98 qytete, kanë ndaluar përdorimin e qeseve plastike. Në 2014-n ky numër shkoi në 20 shtete dhe 132 qytete, duke nënkuptuar se 20 milionë shtetas po jetojnë në një zonë ku ndalohet përdorimi i qeseve plastike.
Kinë
Kina ka ndaluar totalisht qeset plastike nga 1 qershori i 2008-s.
Francë
Në Francë, pas presioneve nga shitësit, supermarketet më të mëdha vendosën çmim për qeset plastike. Parisi i ndaloi në janar të 2007-s.
Burimi: Iconstyle.al
