Leonard Bombaj sapo ka përfunduar aktivitetin Cup Song Albania që i dha Shqipërisë rekordin Guinness, megjithatë historia e akuzave të Ajsi Xhaxhajt, është rikthyer dhe duket se po përzihet me shijen e suksesit, edhe pse për regjisorin ajo është një histori e mbyllur.
Ajsi, vajza që ka qenë e aktivizuar për disa vite te Kripëmjaltëzat, grupi i fëmijëve i drejtuar nga Leonard Bombaj, e ka akuzuar atë për përdhunim. Prokuroria e ka shpallur të pafajshëm Bombajn dhe kjo çështje u mbyll para 6 vitesh, por pak kohë më parë Ajsi, e ftuar në “Pasdite në Top Channel”, përsëriti akuzat ndaj Bombajt, duke e quajtur të padrejtë vendimin e Gjykatës.
Bombaj tha më pas për “Panoramën” që tani, kur Ajsi është maxhorene, ai do të flasë hapur dhe kështu ka bërë në studion e “Oktapod” të Turjan Hyskës në Vizion Plus, edhe pse nuk do të kishte dashur të merrej me një histori të zbardhur nga Drejtësia në një kohë kur do duhej të flitej për një arritje shumë të rëndësishme, që atij i kushtoi pesë muaj përgatitje intensive, siç është rekordi Guinnes.
Tema, megjithatë është shumë sensitive për t’u lënë në heshtje dhe Leonard Bombaj për herë të parë ka folur për disa pika shumë të rëndësishme të kësaj historie.
“Së pari duhet thënë që atë çështje e kam çuar unë në Prokurori. Vajza së bashku me pesë të tjerë më kanë kërcënuar me pistoletë te koka, në shtëpinë time, për t’u tërhequr, por unë nuk pranova. Vajza kishte tetë muaj që përdorte suksesin për vepra kriminale dhe po trafikohej. Për këtë arsye unë vendosa të përjashtohej nga” Sirea Film”. Edhe shkrimet e vitit 2011 flasin për këtë variant të historisë. Në dijeni të veprimeve të vajzës, Leonard Bombaj pasi i kishte bërë thirrje asaj për të ndryshuar sjellje, kishte vendosur përjashtimin nga Kripëmjaltëzat. Si përgjigje, atë e kishin kërcënuar pesë persona, përfshirë edhe këngëtarin Stresi, me të cilin Ajsi ka thënë që ka pasur miqësi.
Ai ka folur për pamjet që janë dorëzuar në Prokurori ku Ajsi shihet duke telefonuar të atin e duke i thënë që është në shtëpinë e profesorit dhe që do i kalonte pastaj bashkëshorten e tij, duke kaluar telefonin nga veshi tjetër dhe duke ndryshuar zërin, për ta gënjyer. “Të gjitha këto janë të provuara”, ka thënë ai dhe “të përmendura në librin tim”. Sipas Bombajt, Ajsi shfrytëzonte emrin e “Sirea Film” për të mbuluar veprimet e saj, e përdorte si vendndodhje të rreme, kur nuk ndodhej në të vërtetë aty dhe ushtronte veprime që nëse do zbuloheshin do krijonin shumë probleme dhe për këtë arsye ajo dhe miqtë e saj e kërcënuan Bombaj kur ai vendosi ta largojë nga “Sirea” dhe ia komunikoi këtë të atit të vajzës, siç shkruhet dhe në artikujt e asaj kohe.
Në intervistën e fundit, aktorja e re, tha që i vjen për të qeshur me librin e Bombajt, por në këtë pikë, regjisori pyet “Të vjen për të qeshur me këngën “Porno” që vetë e ke hedhur në Youtube?”.
Ai u është përgjigjur edhe akuzave që në llogarinë e saj bankare nuk ishin hedhur paratë e pagesave të ndryshme. “Ku është parë që një fëmije, që nuk ishte as fëmija im, t’i hapej një llogari bankare dhe çfarë parash duheshin hedhur kur vajza është shkolluar për tetë vjet në “Sirea Film” falas, që arrin një vlerë rreth 20 mijë euro nëse do i paguante?”, ka shtuar ai.
Leonard Bombaj ka thënë që për veprimet e grupit prej gjashtë vetash, “Gjykata e Krimeve të Rënda e Shkallës së Parë ” dhe “Gjykata e Apelit” ka dhënë dënim me nga dy vjet burg, përfshirë edhe vajzën dhe gjobë në para, megjithatë përfaqësuesit e tij ligjorë do e ndjekin këtë çështje pas intervistës së fundit, nëse do të jetë e nevojshme. “Ajo që më bën mua të mos flas më tej, me provat që kam, është sepse implikohen edhe shumë njerëz që janë pranë vajzës”, ka thënë ai.
Pyetjes nëse ka diçka që e bën të ndihet në faj në këtë histori, Leonard Bombaj i është përgjigjur që ka diçka që e bën të fajësojë veten. “Po ka diçka. Kur unë erdha nga Kanadaja më thanë që duhej të krijoheshin modelet e fëmijëve për t’u ndjekur si Hanna Montana dhe në atë kohë vajza ka qenë shumë e ekspozuar në media. Ne e kemi ekspozuar shumë dhe për këtë ndihem në faj. Megjithatë njëlloj ishte edhe Boni, por ai nuk pati asnjë problem me jetën e tij. Njëlloj edhe Klea Huta, që është një nga figurat më të pastra e më të bukura të televizionit me multitalentet e saj, apo Nik Xhelilaj që po bën karrierë jashtë”, ka thënë ai.
Si përfundim, Bombaj edhe një herë, ka këmbëngulur në media, përderisa çështja është sqaruar plotësisht nga Drejtësia në bazë të provave, nuk ka pse ushqen publikun me këtë temë, që Ajsi, e veshur me kostumin e viktimës, e përdor në karrierën e saj./Class/
