“Një mendje e sëmurë”, kështu e quajti kryeministrja britanike Theresa May, sulmin e së mërkurës në parlamentin e Londrës, ku një sulmues përplasi një makinë mbi këmbësorët në urën e Westminster-it dhe goditi me thikë policin përpara Parlamentit.
Emri i autorit të ngjarjes së rëndë nuk është bërë ende i ditur nga policia, por sipas kreut të njësisë së antiterrorit, Mark Rowley, autoritetet mendojnë se e dinë cili është ky njeri dhe se agresori është frymëzuar nga terrorizmi ndërkombëtar dhe i lidhur me Islamin, por nuk dha detaje të tjera.
Sulmuesi u qëllua për vdekje nga efektivët në terren vetëm pak metra larg kullës ikone të Big Benit. Episodi i dhunës në zemër të Londrës shkaktoi 5 të vdekur, përfshirë dhe vetë autorin, dhe 40 të plagosur, disa prej të cilëve janë në gjendje të rëndë.
Polici 48-vjeçar i qëlluar prej tij ka ndërruar jetë menjëherë. Mjekët që e panë situatën nga afër thonë se disa prej plagëve ishin “katastrofike”. Në mesin e të lënduarve janë tre adoleshentë francezë, që ishin në një udhëtim të shkollës, dy turistë rumunë dhe dy vajza italiane.
Njëra nga viktimat e sulmit ishte një nënë e dy fëmijëve që po shkonte të merrte fëmijët e saj nga shkolla. Aysha Frade, 43 vjeç, ishte rrugës për të marrë dy vajzat, të moshës 8 dhe 11 vjeç, kur ajo u vra në rrugët e Londrës.
Viktima e dytë ishte polici Keith Palmer, 48 vjeç, i cili u qëllua me thikë për vdekje jashtë pallatit të Uestminster. Mënyrën e sulmit, ekspertët e lidhin me ISIS-in.
