Reperi kosovar, Getoar Selimi, dëshmoi dje në seancën gjyqësore të Ledri Vulës, ku të akuzuar janë Gazmend Mirena dhe Krenar Çoçaj. Getoar Selimi kishte qenë dëshmitar okular në natën e 7 qershorit 2012, kur Gazmend Mirena e Krenar Çoçaj (i dashuri i Luana Vjollcës) akuzohen se kishin sulmuar Ledri Vulën, në kohën kur ai gjendej në makinë me dëshmitarin Selimi.
Getoar Selimi ishte i ftuar në cilësinë e dëshmitarit që nga seancën e kaluar, por pas mosparaqitjes së tij në gjykatë, kryetari i trupit gjykues Beqir Kalludra, lëshoi urdhër për sjelljen e tij të detyruar në gjykatë.
Në seancën e djeshme, avokatët mbrojtës Kosovare Kelmendi e Asdren Hoxha, kërkuan nga trupi gjykues që të përjashtohet publiku për shkak të natyrës së rastit. Kësaj kërkese iu bashkangjit edhe avokati i Ledri Vulës, Tomë Gashi, i cili kërkoi përjashtimin e mediave, por jo edhe të publikut.
Pas këshillimit, trupi gjykues në krye me Beqir Kalludran, mori aktvendim që të bëhet përjashimi i publikut, përfshirë këtu edhe mediat.
Çoçaj bashkë me Gazmend Mirenën akuzohen se natën e 7 qershorit 2012, kishin sulmuar Ledri Vulën pasi ia kishin zënë rrugën me veturë dhe e kishin nxjerrë nga vetura në njërën nga rrugët kryesore të Prishtinës.
Sipas aktakuzës, Gazmend Mirena e ka goditur Vulën me kondak të revoles në vetullën e majtë dhe në kokë, ndërsa Krenar Çoçaj me shufër hekuri në shpinë dhe në kokë.
Si rezultat, të akuzuarit Mirena dhe Çoçaj kanë kryer veprën penale lëndim i lehtë trupor, ndërsa Mirena akuzohet edhe për veprën penale të përdorimit të armës, mjet ky i cili kishte shërbyer për rrahjen e viktimës./kallxo.com/
