Ashtu siç pritej, dashuria mes tyre lindi në lokalin ku këngëtari i muzikës rrok këndonte. Andia Ҫakshiri është gjysma më e mirë që Gent Bushpepa ka zgjedhur prej 6-vjetësh tashmë dhe një nga fanset e tij më të mëdha.
I ftuar në “Pasdite” në Top Channel, Genti tregon se si disa vite më parë, Andia i tërhoqi vëmendjen pikërisht sepse nuk donte të tërhiqte vëmendje:
“Andia më ra në sy pikërisht sepse nuk donte të binte në sy. E vija re që e shijonte muzikën, po pa pasur fare asnjë lloj kontakti fizik… Fillimisht ishte e vështirë. U përpoqa të gjeja mënyrën më të përshtatshme të mundshme për t’iu afruar, sepse ishte hera e parë që më ndodhte dhe nuk doja të bëhesha vulgar…” – tregon Genti për takimet e para me Andian, pas momentit kur ajo kishte filluar t’i pëlqente.
Andia, nga ana tjetër, e përshkruan takimin e parë me Gentin si një gjë shumë të bukur, të natyrshme por krejtësisht larg saj.
“Me Gentin jam njohur në lokalin ku luante Genti. Unë isha me një mikeshën time, e cila kishte këmbëngulur që të shkoja. Më pëlqeu shumë ambienti, atmosfera e ngrohtë. Gjithçka ishte mjaft e rehatshme. Unë nuk isha shumë fanse e jetës së natës, por e përsëritëm këtë gjë edhe herë të tjera…” – tregon Andia duke shtuar se në fillim, gjithçka i dukej shumë e bukur, por shumë larg saj: “Më dukej shumë e bukur për të qenë pjesë e imja. E konsideroja si diçka shumë larg meje.”
