Vajza e shkrimtarit të madh, Dritëro Agolli i ka përlotur të gjithë sot me një status prekës për babanë e saj.
Ajo ka shprehur dashurinë për të atin dhe dhembjen e madhe që ndjen kur mendon që ai nuk është mirë nga gjendja shëndetësore. Elona Agolli flet edhe për pasionin e madh të të atit, për shkrimet e tij dhe dashurinë për penën. Ajo i thotë “babushit” se, nëse jeta do të dhurohej, do t’ia jepte atij:
“Babushi im më ndje, e di që ti në këtë orë lufton me errësirën, pasi ti e urren atë. Ti pret dritën. Unë jam me pjellën time tani, në një botë krejt ndryshe nga e jona, në një botë ku konsumohet e gëzohet, e ndërsa ti i përhumbur mendon sesi do të jetë ajo botë e përtejme, ku mbizotëron errësira, ajo çka vështirë për ty si ateist të mendohet e bukur dhe shpresëdhënëse. Ati im më ndje, unë jam me Luelin e duhet të jem e gëzuar në sytë e tij, paçka se zëmra pikon lot, paçka se mendjen e kam tek ti. Të dua shumë ati im. Nëse do të mund të dhurohej jeta, unë do ta jepja për ty, nëse do të mund të transferohej gëzimi, unë do të bëja çmos të të lumturoja. Sot të bleva një shishe bojë e një pompë për stilografin tënd. Siç ma dhe porosinë para se të nisesha. Kur të kthehem, do të t’i tregoj dhe e di që do kënaqesh. Do mbushësh penën tënde, që aq ka gërvishtur letrën e aq vargje e radhë ka shkruar. Të dua shumë”, shkruan vajza e Dritëroit.
