Pas 7 vitesh, dëbora përfshiu edhe kryeqytetin. Në orët e mbrëmjes së të enjtes, Tirana dhe Durrësi u zbardhën për disa minuta, teksa temperaturat ishin nën zero. Dëbora ia la vendin ngricave në pjesën më të madhe të territorit të vendit.
Problemet më të mëdha dallohen në verilindje. Të gjitha njësitë administrative në Dibër rezultojnë të bllokuara. Në aksin Peshkopi-Tiranë, qarkullimi kryhet me vështirësi dhe vetëm me zinxhirë, ndërsa temperaturat zbritën në -7 gradë celsius.
Persona të sëmurë në fshatra u dërguan në Spitalin e Burrelit për ndihmë mjekësore. Emergjencë pati dhe në aksin Qafë Ulzë-Bushkash ku makinat u bllokuan në borë.
Moti i keq me reshje dëbore po krijon vështirësi në rrethin e Pukës, ku raportohen fshatra të bllokuar.
Në aksin Pukë-Fushë Arrëz, qarkullimi bëhet me zinxhirë, ndërsa në Hadroj-Mirditë lëvizet me vështirësi. Në Pukë e Fushë-Arrëz termometri shënon -11 gradë. Me përjashtim të Iballës, të gjitha akset e Fushë Arrëzit janë të bllokuara. Probleme me qarkullimin ka edhe ne aksin Elbasan-Librazhd-Qafë Thanë.
E bllokuar nga bora që arrin 50 cm është Njësia Administrative Steblevë. Gjithashtu është bllokuar qarkullimi në Kthesën e Murrashit në rrugën Librazhd-Elbasan. Reshjet e dëborës nuk mungojnë as në juglindje, por janë të një intensiteti të ulët.
Viktima e parë u shënua në Kukës, ku një punonjës i OSHEE-së mësohet se ndërroi jetë gjatë riparimit të defektit të shtyllës elektrike.
Ndërkohë që i ftohti arktik pritet t’i ulë të shtunën temperaturat deri në -20 gradë celsius.
