Gazetari i njohur shqiptar Blendi Fevziu ka folur për rrogën e tij, e cila shpeshherë është përfolur duke u bërë subjekt i kuriozitetit të shumë personave. Në një intervistë të fundit për Vila 24, ku foli për familjen, karrierën dhe pasionet e tij, Fevziu iu përgjigj edhe pyetjes për rrogën e tij.
“Rroga është një kontratë personale. Lidhet me rrethanat. Unë kam qenë ndër gazetarët e parë në Shqipëri që nuk kam qenë dakord me një kontratë standarde, por në varësi të reklamave që sjell. Pra, nuk paguhem njësoj çdo vit. Jam ndër gazetarët që rri në çdo moment në vëmendje të matjes së audiencës. Unë e kam raportin drejtpërdrejt me shikuesin. Unë paguhem shumë. Standardi im i jetesës nuk vjen vetëm nga rroga, por nga një lloj trashëgimie e familjes sime. Edhe nga librat e mi kanë ardhur fitime. Librin nuk e kontrollon dot sa shiti, si u shit. Por unë kam pasur një kontratë fillimisht me blerësin”, pohoi moderatori i njohur.
