Studimet e fundit po paralajmërojnë për një zakon që shumë njerëz e kanë pothuajse të përditshëm: ngrënien e vakteve të vogla apo “snacks”-eve në orët e vona të natës. Ekspertët thonë se ekziston një orar i caktuar kur “thumbimi” i ushqimeve bëhet më i dëmshëm për organizmin, duke ndikuar jo vetëm në shtimin në peshë, por edhe në rritjen e nivelit të sheqerit në gjak.
Sipas specialistëve të ushqyerjes, konsumimi i ushqimeve pas orës 21:00 konsiderohet një nga momentet më problematike për metabolizmin. Në këtë orar, trupi fillon të ngadalësojë proceset metabolike dhe nuk e përpunon ushqimin me të njëjtën shpejtësi si gjatë ditës.
Kjo do të thotë se ushqimet e konsumuara natën, sidomos ato të pasura me sheqer, karbohidrate apo yndyrna, kanë më shumë gjasa të shndërrohen në dhjamë dhe të shkaktojnë luhatje të nivelit të glukozës në gjak.
Ekspertët paralajmërojnë se ngrënia e pakontrolluar në mbrëmje mund të rrisë rrezikun për:
-shtim në peshë,
-probleme me insulinën,
-pagjumësi,
-lodhje gjatë ditës,
-dhe rritje të rrezikut për diabet.
Gjithashtu, njerëzit që hanë shpesh vonë gjatë natës raportojnë më shumë uri emocionale dhe dëshirë për ushqime të pashëndetshme. Specialistët rekomandojnë që vakti i fundit të konsumohet të paktën 2-3 orë para gjumit dhe, nëse ndjeni uri në darkë, të zgjidhni alternativa më të lehta si kos, fruta ose arra në sasi të moderuar. Një zakon i vogël si “thumbimi” gjatë natës mund të duket i pafajshëm, por sipas ekspertëve, ai mund të ketë ndikim të madh në shëndetin dhe metabolizmin tonë.
