Kjo e hënë pritet të sjellë kushte atmosferike relativisht të paqëndrueshme në të gjithë territorin e Shqipërisë, megjithëse pjesa më e madhe e ditës do të dominohet nga kthjellime dhe intervale me diell.
Sipas parashikimeve meteorologjike, orët e paradites do të karakterizohen nga mot i qetë dhe vranësira të pakta kalimtare. Megjithatë, situata pritet të ndryshojë gradualisht nga mesdita deri në orët e pasdites, kur vranësirat do të shtohen kryesisht në zonat malore të vendit.
Meteorologët bëjnë me dije se reshjet e shiut do të jenë të dobëta dhe lokale, duke prekur më së shumti zonat jugore dhe lindore, veçanërisht përgjatë relieveve malore. Reshjet nuk pritet të jenë intensive dhe do të kenë karakter të përkohshëm, ndërsa pasditja vonë dhe mbrëmja do të sjellin përmirësim të motit dhe ndërprerje të reshjeve në të gjithë vendin.
Sa i përket erës, ajo do të fryjë me drejtim nga veriperëndimi drejt verilindjes, me një shpejtësi mesatare rreth 5 metra në sekondë. Në disa zona bregdetare dhe luginore, era mund të fitojë intensitet më të lartë, duke arritur deri në 12 metra në sekondë.
Edhe kushtet në det paraqiten të favorshme. Në detin Adriatik dhe Jon valëzimi do të jetë i ulët deri mesatar, me forcë nga 1 deri në 3 ballë, duke mos sjellë probleme për lundrimin.
