Të paktën 82 persona kanë humbur jetën pas një shpërthimi të fuqishëm gazi në një minierë qymyri në veri të Kinës, në një nga aksidentet më të rënda minerare të viteve të fundit në vend.
Ngjarja tragjike ndodhi në minierën Liushenyu, në qytetin Changzhi të provincës Shanxi, zonë e njohur për industrinë e saj të zhvilluar të qymyrit. Sipas mediave shtetërore kineze, shpërthimi ndodhi mbrëmjen e së premtes, në kohën kur qindra minatorë ndodheshin nën tokë.
Televizioni shtetëror CCTV raportoi se ekipet e shpëtimit vijojnë operacionet intensive për kërkimin e personave të zhdukur, ndërsa autoritetet po përpiqen të përcaktojnë bilancin përfundimtar të viktimave.
Sipas agjencisë Xinhua, nivelet e larta të monoksidit të karbonit brenda minierës dyshohet se kanë lidhje direkte me shpërthimin fatal. Nga të dhënat paraprake mësohet se në momentin e aksidentit nëntokë ndodheshin 247 minatorë, ndërsa mbi 200 persona janë evakuuar me sukses gjatë orëve të para pas shpërthimit.
Pas ngjarjes ka reaguar edhe presidenti kinez, Xi Jinping, i cili ka kërkuar mobilizim maksimal për operacionet e shpëtimit dhe një hetim të plotë për zbardhjen e shkaqeve të tragjedisë.
Provinca Shanxi konsiderohet zemra e industrisë së qymyrit në Kinë, por prej vitesh është kritikuar për standarde të dobëta sigurie dhe aksidente të shpeshta në miniera.
