Trajneri brazilian Sylvinho ka mbyllur zyrtarisht aventurën e tij në krye të Kombëtares shqiptare, pas thuajse tre vite e gjysmë në drejtimin e kuqezinjve. Lajmi u konfirmua gjatë konferencës për shtyp, ku tekniku bëri të ditur përfundimin e këtij cikli, duke shprehur mirënjohje për të gjithë ata që kanë qenë pjesë e rrugëtimit të tij.
Gjatë deklaratës së tij, Sylvinho theksoi bashkëpunimin e ngushtë me ekipin dhe institucionet, duke vlerësuar atmosferën dhe mbështetjen e marrë gjatë kësaj periudhe. Ai nuk la pa përmendur as tifozët shqiptarë, të cilët sipas tij kanë qenë një burim i rëndësishëm energjie pozitive gjatë gjithë kohës së tij në stol.
“Kemi vendosur që të mbyllim këtë cikël, në të cilin kemi punuar shumë për të përfaqësuar më së miri këtë komb. Më kanë pritur të gjithë shumë mirë. Dua të falënderoj Shqipërinë dhe shqiptarët. Të falënderoj presidentin, Federatën dhe të gjithë ata që kemi punuar. Dua të falënderoj të gjithë stafin, të gjithë futbollistët, të cilët kanë bërë një rrugëtim prej tre vitesh e gjysmë me ne. Tifozët, shumë dashamirës ndaj Kombëtares. Për ne ka qenë një energji shumë pozitive. Më kujtohet që nga dita e parë që kam qenë këtu, 9 janari i 2023, kam thënë diçka: ‘Shpirti, zemra dhe djersa nuk duhet të mungojnë kurrë’. Ja kemi dalë të gjithë së bashku. I uroj shumë suksese trajnerit të ri. Faleminderit shumë”, u shpreh Sylvinho.
Ai u largua duke lënë pas një periudhë pune intensive dhe një grup të konsoliduar lojtarësh, ndërsa tashmë pritet që Federata Shqiptare e Futbollit të vendosë për pasuesin e tij në drejtimin e Kombëtares.
