Një tërmet me magnitudë 5.2 ballë goditi rajonin Guangxi në jugperëndim të Kinës në orët e para të mëngjesit të së hënës, duke shkaktuar viktima, dëme materiale dhe panik te banorët e zonës. Sipas mediave shtetërore kineze, lëkundjet sizmike u regjistruan në qytetin Liuzhou rreth orës 00:21 me kohën lokale.
Si pasojë e tërmetit, dy persona humbën jetën. Viktimat janë identifikuar si një çift bashkëshortësh, një burrë 63-vjeçar dhe një grua 53-vjeçare. Ndërkohë, autoritetet bëjnë me dije se një person rezulton ende i zhdukur, ndërsa ekipet e kërkim-shpëtimit po vijojnë operacionet në zonat më të prekura.
Katër persona të tjerë janë transportuar në spital për ndihmë mjekësore, por fatmirësisht ndodhen jashtë rrezikut për jetën. Sipas raportimeve të televizioneve shtetërore CCTV dhe agjencisë Xinhua, të paktën 13 ndërtesa janë shembur gjatë orëve të para pas goditjes së tërmetit.
Autoritetet kineze kanë evakuuar më shumë se 7 mijë banorë për arsye sigurie, ndërsa paralajmërohet se mund të ketë edhe pasgoditje të tjera. Gjithashtu, janë raportuar probleme në qarkullim dhe ndërprerje në transport, teksa ekipet emergjente po punojnë për rikthimin e normalitetit në zonë.
Në fund, autoritetet u kanë bërë thirrje banorëve të qëndrojnë vigjilentë dhe të ndjekin udhëzimet e emergjencës deri në stabilizimin e plotë të situatës.
