Një tjetër protestë pritet të zhvillohet më 18 maj në Shkup, ku studentët shqiptarë do të ngrihen për të kërkuar një të drejtë që e konsiderojnë legjitime: zhvillimin e provimit të jurisprudencës në gjuhën shqipe.
Kjo lëvizje vjen në vazhdën e pakënaqësive të vazhdueshme nga studentët shqiptarë, të cilët pretendojnë se po u mohohet e drejta për të studiuar dhe për t’u vlerësuar në gjuhën e tyre amtare, pavarësisht statusit të saj si gjuhë zyrtare në vend. Sipas tyre, kjo situatë bie ndesh me parimet e barazisë dhe të drejtave themelore në arsim.
Thirrjes për pjesëmarrje në këtë protestë i është bashkuar edhe ish-kapiteni i Kombëtares shqiptare të futbollit, Lorik Cana, i cili ka reaguar publikisht duke shprehur mbështetjen e tij për kauzën e studentëve.
Në një mesazh të shpërndarë në rrjetet sociale, Cana thekson rëndësinë e gjuhës si një element themelor i identitetit kombëtar:
“Gjuha është një nga shtyllat e identitetit; kur ajo mohohet, mohohen të gjitha të drejtat për barazi, zhvillim dhe përkatësi! Ne nuk pretendojmë asgjë më shumë sesa atë që kemi fituar nëpërmjet sakrificës së paraardhësve tanë dhe të drejtës sonë të studiojmë në gjuhën tonë etnike, autoktone dhe shtetformuese. Bashkohu dhe ti”, shkruan ai.
Protesta e paralajmëruar pritet të mbledhë një numër të madh studentësh dhe qytetarësh, ndërsa organizatorët bëjnë thirrje për pjesëmarrje masive dhe solidaritet, me synimin për të ushtruar presion ndaj institucioneve përkatëse që të marrin masa konkrete.
Ndërkohë, mbetet për t’u parë se si do të reagojnë autoritetet në Shkup ndaj këtyre kërkesave, ndërsa çështja e përdorimit të gjuhës shqipe në sistemin arsimor vijon të mbetet një debat i hapur në vend.
