Një tjetër zhvillim i rëndësishëm ka ardhur në lidhje me atentatin ndaj personazhit të njohur në TikTok, Fabion Kuçi, i njohur ndryshe si “Gucci”. Një 23-vjeçar, i shpallur në kërkim për këtë ngjarje të rëndë, është vënë në prangat e policisë pas një operacioni të zhvilluar në Tiranë.
Bëhet fjalë për Florian Brahajn, i cili u arrestua në kuadër të operacionit të koduar “Akuza”. Sipas burimeve zyrtare, ndaj tij rëndon akuza për “vrasje me paramendim”, e mbetur në tentativë dhe e kryer në bashkëpunim me persona të tjerë.
Ngjarja për të cilën akuzohet 23-vjeçari daton më 15 dhjetor të vitit të kaluar, në lagjen nr. 9 të Durrësit. Nga hetimet rezulton se Brahaj, së bashku me tre persona të tjerë, kanë tentuar të ekzekutojnë me armë zjarri Fabion Kuçin, duke qëlluar në drejtim të tij në ambientet e një lokali ku ai ndodhej në atë moment. Fatmirësisht, nga ky atentat Kuçi ka arritur të shpëtojë.
Arrestimi i Brahajt u bë i mundur falë bashkëpunimit mes specialistëve të Seksionit për Hetimin e Krimeve ndaj Personit në Drejtorinë Vendore të Policisë Durrës dhe shërbimeve të Komisariatit të Policisë Kamëz, të cilët finalizuan me sukses operacionin.
Ndërkohë, mësohet se Gjykata e Durrësit kishte caktuar ndaj tij masën e sigurisë “arrest në burg” që në muajin mars të vitit 2026, pasi provat e mbledhura nga hetimet e implikonin si një nga autorët e dyshuar të atentatit ndaj Kuçit.
Hetimet për këtë ngjarje vijojnë, ndërsa autoritetet janë në kërkim edhe të personave të tjerë të përfshirë në atentat.
