Një tragjedi e rëndë ka tronditur Maldive-t, ku pesë turistë italianë humbën jetën gjatë një zhytjeje në ujërat pranë zonës turistike të Alimathaa. Mes viktimave raportohet të jetë edhe një studiues nga Xhenova, ndërsa autoritetet vijojnë hetimet për të zbardhur plotësisht rrethanat e ngjarjes.
Sipas mediave lokale, grupi i turistëve ndodhej në një anije private të specializuar për zhytje dhe kishte hyrë në ujë gjatë orëve të paradites. Alarmi u dha rreth orës 10:45 me orën italiane, pasi zhytësit nuk u rikthyen më në sipërfaqe brenda kohës së parashikuar.
Menjëherë pas njoftimit, autoritetet maldiviane nisën një operacion të gjerë kërkimi dhe shpëtimi në zonë, ku u përfshinë ekipe emergjence dhe mjete detare. Pas disa kërkimeve, trupat e pesë turistëve u gjetën në det.
Policia ka konfirmuar se hetimet janë në vijim dhe se ende nuk është përcaktuar shkaku zyrtar i vdekjes së viktimave. Megjithatë, dyshimet e para lidhen me kushtet e pafavorshme atmosferike që mbizotëronin në zonë në momentin e incidentit.
Sipas raportimeve, shërbimi meteorologjik kishte lëshuar një paralajmërim të verdhë për mot të keq dhe rryma të forta detare, paralajmërim i cili ishte aktiv gjatë gjithë ditës.
Autoritetet po verifikojnë nëse kushtet e vështira në det kanë ndikuar drejtpërdrejt në tragjedinë që ka tronditur komunitetin turistik në Maldive dhe familjarët e viktimave në Itali.
